اسلام آباد، 14 اکتوبر 2026 (کامران راجہ): چین نے امریکی صدر ڈونلڈ ٹرمپ اور چینی صدر شی جن پنگ کے درمیان ستمبر میں واشنگٹن میں ہونے والی سربراہی ملاقات کے بعد پہلی بار امریکا سے سویا بین کی 8 سے 10 کھیپیں خرید لی ہیں۔ خبر رساں ادارے رائٹرز کے مطابق تین تجارتی ذرائع نے بتایا کہ یہ کھیپیں دسمبر سے چین روانہ کی جائیں گی اور ہر کھیپ میں تقریباً 65 ہزار میٹرک ٹن سویا بین شامل ہوگی۔ یہ خریداری چین کی سرکاری تجارتی کمپنیوں نے کی ہے، جس سے کئی ہفتوں کے وقفے کے بعد امریکی سویا بین کی طلب میں دوبارہ اضافے کی توقعات پیدا ہوئی ہیں۔ تاجروں کے مطابق چینی کمپنیوں نے شکاگو بورڈ آف ٹریڈ کے جنوری کے سویا بین فیوچرز معاہدے کے مقابلے میں فی بشل 3.10 سے 3.20 ڈالر اضافی قیمت ادا کی۔ ستمبر کی ملاقات کے بعد امریکا اور چین نے محصولات میں ممکنہ کمی کی فہرست کا اعلان کیا تھا، تاہم اس میں سویا بین کو شامل نہیں کیا گیا، جس سے چین کی نجی کمپنیوں کی جانب سے امریکی سویا بین کی مزید خریداری کی توقعات متاثر ہوئی تھیں۔ تازہ خریداری سے قبل چین امریکا سے تقریباً 1 کروڑ 37 لاکھ میٹرک ٹن سویا بین خرید چکا تھا، جو 2026-27 کے تجارتی سال کے لیے وائٹ ہاؤس کی جانب سے مقرر کردہ 2 کروڑ 50 لاکھ میٹرک ٹن کے ہدف کے نصف سے زیادہ ہے۔ دوسری جانب چینی سرکاری تجارتی ادارے سائنُوگرین نے منگل کو نیلامی کے لیے پیش کیے گئے درآمدی سویا بین کے 5 لاکھ 18 ہزار میٹرک ٹن ذخیرے میں سے 40.5 فیصد فروخت کیا۔ مشاورتی ادارے مائی اسٹیل کے اعداد و شمار کے مطابق آنے والے ہفتوں میں مزید نیلامیوں کی توقع ہے۔ چین کے محکمہ کسٹمز کے سرکاری اعداد و شمار کے مطابق ستمبر میں ملک نے 1 کروڑ 18 لاکھ 80 ہزار میٹرک ٹن سویا بین درآمد کی، جو گزشتہ سال کے اسی مہینے کے مقابلے میں 7.7 فیصد کم ہے۔