غزہ، 25 اکتوبر 2026 (غفران): غزہ شہر کی ایک یونیورسٹی پر اسرائیلی حملے میں اتوار کے روز 3 افراد جاں بحق ہوگئے، جبکہ غزہ کی پٹی کے مختلف علاقوں میں الگ الگ فضائی حملوں کے نتیجے میں مزید 4 فلسطینی شہید ہوگئے، اسپتال کے عملے اور شہری دفاع کے ادارے نے بتایا۔ الشفا اسپتال کے مطابق ڈرون حملے کے بعد 3 لاشیں اسپتال منتقل کی گئیں جبکہ 8 زخمیوں کو طبی امداد فراہم کی گئی، اسلامی یونیورسٹی کے ذرائع نے بتایا کہ جاں بحق ہونے والے افراد انتظامی عملے کے ارکان تھے جبکہ زخمیوں میں طلبہ شامل تھے۔ غزہ کی وزارت تعلیم نے کہا کہ حملے کے وقت طلبہ کلاسوں میں موجود تھے، وزارت نے حملے کی مذمت کرتے ہوئے خبردار کیا کہ تعلیمی اداروں پر حملوں کے خلاف عالمی خاموشی ایسے جرائم کے تسلسل کی حوصلہ افزائی کر رہی ہے۔ وزارت کے مطابق جنگ کے دوران تعلیمی اداروں کی 95 فیصد عمارتیں تباہ یا متاثر ہوچکی ہیں جبکہ گزشتہ 6 روز کے دوران اسرائیلی فائرنگ سے 10 طلبہ اور اساتذہ جاں بحق ہوئے۔ غزہ کے شہری دفاع کے ترجمان محمود بسال نے بتایا کہ اتوار کو مزید 4 فلسطینی شہید ہوئے، جن میں 2 خان یونس، ایک دیر البلح اور ایک شمالی غزہ میں جاں بحق ہوا۔ رواں ہفتے جمعرات کو بھی اسرائیلی فضائی حملوں اور فائرنگ کے نتیجے میں غزہ میں کم از کم 4 افراد جاں بحق ہوئے تھے۔ غزہ میں ایک سال سے زائد عرصے سے جنگ بندی نافذ ہونے کے باوجود اسرائیلی حملے مکمل طور پر نہیں رک سکے۔ غزہ کے محکمہ صحت کے حکام کے مطابق جنگ بندی کے بعد اسرائیلی فضائی حملوں میں کم از کم 1,500 فلسطینی جاں بحق ہوچکے ہیں، جبکہ اسرائیل کا کہنا ہے کہ اس کے 4 فوجی ہلاک ہوئے ہیں۔ فلسطینی حکام کے مطابق غزہ پر اسرائیلی حملوں میں اب تک 74 ہزار سے زائد افراد جاں بحق ہوچکے ہیں۔ اسرائیلی فوج نے یونیورسٹی پر حملے کی اطلاعات پر تبصرہ کرتے ہوئے کہا کہ وہ ان رپورٹس کی تحقیقات کر رہی ہے۔