اسلام آباد، 6 اگست (نوشین): وزیراعظم محمد شہباز شریف اور چیف آف ڈیفنس فورسز (سی ڈی ایف) و چیف آف آرمی اسٹاف (سی او اے ایس) فیلڈ مارشل عاصم منیر 6 سے 8 اگست تک مملکتِ سعودی عرب کا سرکاری دورہ کریں گے۔ اس بات کا اعلان دفترِ خارجہ نے جمعرات کو کیا۔ دفترِ خارجہ کے ترجمان طاہر اندرابی کے مطابق پاکستانی وفد میں نائب وزیراعظم و وزیر خارجہ سینیٹر محمد اسحاق ڈار بھی شامل ہوں گے، جو اردن کا دورہ مکمل کرنے کے بعد اس وقت سعودی عرب میں موجود ہیں۔ دورے کے دوران وزیراعظم شہباز شریف سعودی ولی عہد اور وزیراعظم شہزادہ محمد بن سلمان سے ملاقات کریں گے۔ ملاقات میں پاکستان اور سعودی عرب کے درمیان دیرینہ برادرانہ تعلقات کو مزید مستحکم بنانے، مختلف شعبوں میں دوطرفہ تعاون کو فروغ دینے اور باہمی دلچسپی کے علاقائی و بین الاقوامی امور پر تبادلۂ خیال کیا جائے گا۔
دفترِ خارجہ کے مطابق یہ دورہ خطے میں امن، سفارتی تعاون اور مشرقِ وسطیٰ میں استحکام کے لیے مشترکہ حکمتِ عملی کو فروغ دینے کے حوالے سے نہایت اہمیت کا حامل ہے۔ ترجمان نے کہا کہ پاکستان مشرقِ وسطیٰ میں کشیدگی کے خاتمے اور تنازعات کے پرامن حل کے لیے اپنی سفارتی کوششیں جاری رکھے ہوئے ہے اور اختلافات کو مذاکرات اور تعمیری سفارت کاری کے ذریعے حل کرنے کی حمایت کرتا ہے۔ مشرقِ وسطیٰ میں جاری کشیدہ صورتحال کے تناظر میں وزیراعظم کا یہ دورہ خصوصی اہمیت رکھتا ہے اور اس سے پاکستان اور سعودی عرب کے درمیان اسٹریٹجک تعاون، علاقائی امن اور استحکام کے فروغ کے لیے جاری قریبی روابط کو مزید تقویت ملنے کی توقع ہے۔