اسلام آباد، 14 اکتوبر 2026 (غفران): کولمبیا نے یروشلم میں اپنا سفارت خانہ کھول لیا ہے، جس کے بعد وہ اس شہر میں سفارتی مشن قائم کرنے والا دنیا کا دسواں ملک بن گیا ہے۔ اس کے ساتھ ہی کولمبیا نے اسرائیل کے ساتھ آزاد تجارتی معاہدہ بھی بحال کر دیا ہے، جو صدر ابیلاردو دے لا ایسپریلا کی قیادت میں دونوں ممالک کے تعلقات میں بڑی تبدیلی کا مظہر ہے۔ اس اقدام کے ذریعے کولمبیا نے سابق صدر گستاوو پیٹرو کی پالیسی سے انحراف کیا ہے، جنہوں نے غزہ میں اسرائیلی فوجی کارروائیوں کے خلاف احتجاج کرتے ہوئے مئی 2024 میں اسرائیل کے ساتھ سفارتی تعلقات منقطع کر دیے تھے اور اسرائیلی وزیراعظم بینجمن نیتن یاہو پر سخت تنقید کی تھی۔ سابق صدر نے تل ابیب میں کولمبیا کا سفارت خانہ بند کرنے کے ساتھ اپنا سفیر بھی واپس بلا لیا تھا، جس پر اسرائیل نے شدید ردعمل ظاہر کیا تھا۔ کولمبیا کے نئے صدر، جو دائیں بازو سے تعلق رکھتے ہیں اور اگست میں عہدہ سنبھال چکے ہیں، نے اسرائیل کے ساتھ سفارتی اور اقتصادی تعلقات کی بحالی کے لیے اقدامات کیے ہیں۔ سفارت خانے کی افتتاحی تقریب سے خطاب کرتے ہوئے کولمبیا کے وزیر خارجہ عمر بولا ایسکوبار نے کہا کہ یہ اقدام دونوں ممالک کے تعلقات کی بحالی کی جانب ایک عملی پیش رفت ہے اور اسرائیل ایک تزویراتی شراکت دار ہے۔ اسرائیلی وزیر خارجہ گیڈون سار نے اس پیش رفت کا خیرمقدم کرتے ہوئے کہا کہ یروشلم میں سفارت خانہ کھولنا اسرائیل کے اس مؤقف کو تسلیم کرنے کے مترادف ہے کہ یروشلم اس کا دارالحکومت ہے، نیز اس شہر کی تاریخی اہمیت کا اعتراف بھی ہے۔ اسرائیلی وزارت خارجہ کے مطابق دونوں ممالک کے وزرائے خارجہ بدھ کو دوطرفہ مذاکرات کریں گے، جن میں باہمی تعلقات اور تعاون پر تبادلہ خیال کیا جائے گا۔ دنیا کے بیشتر ممالک کے سفارت خانے تل ابیب میں قائم ہیں، جبکہ یروشلم کی حیثیت اسرائیل فلسطین تنازع کے اہم ترین اور متنازع معاملات میں شمار ہوتی ہے۔ اسرائیل یروشلم کو اپنا دارالحکومت قرار دیتا ہے، جبکہ فلسطینی مشرقی یروشلم کو مستقبل کی آزاد فلسطینی ریاست کا دارالحکومت بنانا چاہتے ہیں۔ امریکا کی جانب سے 2018 میں اپنا سفارت خانہ یروشلم منتقل کرنے کے بعد گوئٹے مالا، ہونڈوراس، پیراگوئے اور صومالی لینڈ سمیت متعدد ممالک بھی اپنے سفارتی مشن اس شہر میں منتقل کر چکے ہیں۔