ڈیرہ اسماعیل خان، 28 ستمبر, 2026 (کامران راجہ): سیکیورٹی فورسز نے پیر کے روز ڈیرہ اسماعیل خان میں انٹیلی جنس بیسڈ آپریشن کے دوران چار دہشت گردوں کو ہلاک کردیا۔ ذرائع کے مطابق آپریشن ’’عزمِ استحکام‘‘ کے تحت کیا گیا، جس میں سیکیورٹی فورسز نے علاقے میں دہشت گردوں کی نقل و حرکت کی نگرانی کے بعد کامیاب کارروائی کی۔ ہلاک دہشت گردوں کے قبضے سے بڑی تعداد میں اسلحہ و گولہ بارود اور افغان کرنسی برآمد کی گئی۔ سیکیورٹی فورسز نے ملک سے دہشت گردی کے خاتمے اور پائیدار امن کے قیام کے عزم کا اعادہ کیا۔ دوسری جانب لکی مروت پولیس اور کاؤنٹر ٹیررازم ڈیپارٹمنٹ (سی ٹی ڈی) نے مشترکہ کارروائی کے دوران مطلوب دہشت گرد کمانڈر منظور کو بھی ہلاک کردیا، جو دہشت گردی کے متعدد مقدمات اور شہریوں پر حملوں میں مطلوب تھا۔ پولیس کے مطابق کارروائی عبدالخیل کے علاقے میں میچ سے واپس آنے والے کھلاڑیوں پر حملے میں مبینہ طور پر ملوث دہشت گردوں کے خلاف کی گئی، جس میں ایک روز قبل تین اہلکار شہید اور تین زخمی ہوئے تھے۔ کارروائی کے دوران سیکیورٹی اہلکاروں نے منظور کو ہلاک کرکے لاش قبضے میں لے لی، جبکہ علاقے میں دیگر مشتبہ دہشت گردوں کی گرفتاری کے لیے سرچ آپریشن جاری ہے۔