اسلام آباد، 8 نومبر 2026 (نوشین): اسرائیل کے وزیر دفاع اسرائیل کاٹز نے دعویٰ کیا ہے کہ ایران نے جوہری ہتھیار حاصل کرنے کی کوششیں دوبارہ شروع کر دی ہیں، جبکہ تہران بدستور اسرائیل کی قومی سلامتی کے لیے سنگین خطرہ ہے۔ غیر ملکی خبر رساں ادارے اے ایف پی کے مطابق اسرائیلی وزیر دفاع نے اتوار کے روز ایک تقریب سے خطاب کرتے ہوئے کہا کہ ایران نہ صرف اپنے جوہری ہتھیاروں کے پروگرام کو دوبارہ فعال کرنے کی کوشش کر رہا ہے بلکہ دیگر سرگرمیوں میں بھی مصروف ہے جو اسرائیل کی سلامتی کے لیے خطرہ بن سکتی ہیں۔ اسرائیل کاٹز کا کہنا تھا کہ ایران کے حوالے سے اسرائیل کا مشن ابھی مکمل نہیں ہوا اور ملک کو درپیش خطرات کے پیش نظر سیکیورٹی صورتحال پر مسلسل نظر رکھنے کی ضرورت ہے۔ تاہم اسرائیلی وزیر دفاع نے ایران کی جانب سے جوہری ہتھیاروں کی تیاری کی کوششیں دوبارہ شروع کرنے کے اپنے دعوے کے حق میں کوئی شواہد پیش نہیں کیے۔ ایران طویل عرصے سے جوہری ہتھیار بنانے سے متعلق اسرائیلی الزامات کی تردید کرتا آیا ہے۔ دونوں ممالک کے درمیان بڑھتی ہوئی کشیدگی اور خطے کی مجموعی سیکیورٹی صورتحال عالمی توجہ کا مرکز بنی ہوئی ہے۔