اسلام آباد، یکم نومبر 2026 (نوشین): نائب وزیراعظم اور وزیر خارجہ سینیٹر اسحاق ڈار نے اتوار کو مالدیپ کی وزیر خارجہ اریتھیشم آدم سے ٹیلی فونک رابطہ کیا، جس میں دونوں ممالک کے دوطرفہ تعلقات اور باہمی تعاون کو وسعت دینے کے امکانات پر گفتگو کی گئی۔ دفتر خارجہ کے مطابق دونوں رہنماؤں نے باہمی دلچسپی کے امور، پہلے سے طے شدہ معاہدوں اور مفاہمتوں پر عمل درآمد میں پیش رفت اور سفارتی روابط برقرار رکھنے کی اہمیت پر تبادلہ خیال کیا۔ دولت مشترکہ کے سربراہان حکومت کے اجلاس میں شرکت کے لیے انٹیگوا و باربوڈا میں موجود مالدیپ کی وزیر خارجہ نے مالدیپ کے صدر اور ان کے وفد کے حالیہ دورہ اسلام آباد کے دوران پاکستانی میزبانی پر شکریہ ادا کیا۔ دونوں رہنماؤں نے طے شدہ مفاہمتوں پر عمل درآمد اور اعلیٰ سطحی روابط کے ذریعے دوطرفہ تعلقات مزید مستحکم بنانے کے عزم کا اعادہ کیا۔ وزرائے خارجہ نے دولت مشترکہ کے اجلاس کے ایجنڈے اور کثیرالجہتی فورمز پر تعاون کے مختلف پہلوؤں پر بھی تبادلہ خیال کیا۔ ترجمان دفتر خارجہ کے مطابق یہ رابطہ پاکستان اور مالدیپ کے درمیان سفارتی تعلقات کو مزید گہرا کرنے کی جاری کوششوں کا حصہ ہے۔