واشنگٹن، 21 اکتوبر 2026 (غفران): امریکی وزیر خارجہ مارکو روبیو نے کہا ہے کہ پاکستان کے ساتھ تعلقات برقرار رکھنا واشنگٹن کے لیے اسٹریٹجک اہمیت کا حامل ہے اور وسیع تر جغرافیائی و سیاسی تناظر میں دونوں ممالک کے باہمی تعلقات اہمیت رکھتے ہیں۔ بھارتی میڈیا کو انٹرویو دیتے ہوئے مارکو روبیو نے کہا کہ امریکا دنیا بھر میں دہشت گردی کی مخالفت کرتا ہے اور دہشت گردانہ سرگرمیوں کی حمایت کرنے والے افراد اور ممالک کے خلاف ہے۔ انہوں نے کہا کہ واشنگٹن پاکستان کے ساتھ تعلقات برقرار رکھے ہوئے ہے اور جغرافیائی و سیاسی مفادات کے پیش نظر ان تعلقات کو ضروری سمجھتا ہے۔ بھارت کے ایران کے ساتھ تعلقات کا حوالہ دیتے ہوئے امریکی وزیر خارجہ نے کہا کہ جس طرح بھارتی حکومت کے لیے تہران کے ساتھ تعلقات برقرار رکھنا اور ایرانی قیادت سے ملاقاتیں کرنا ضروری ہے، اسی طرح امریکا کے لیے بھی اسلام آباد کے ساتھ اپنے تعلقات قائم رکھنا اہم ہے۔ ان کے بیان سے ظاہر ہوتا ہے کہ علاقائی پیچیدگیوں اور قومی مفادات میں اختلافات کے باوجود سفارتی روابط برقرار رکھنا ضروری ہے۔ مارکو روبیو نے اس جانب بھی اشارہ کیا کہ اسلام آباد کے ساتھ واشنگٹن کا مسلسل رابطہ علاقائی اور دوطرفہ مسائل کے حل میں تعمیری کردار ادا کرنے کے مواقع فراہم کر سکتا ہے۔ ان کے بیان کو امریکی خارجہ پالیسی میں پاکستان کی اسٹریٹجک اہمیت اور خطے میں استحکام، تعاون اور مذاکرات کے فروغ کے لیے سفارتی رابطوں کی اہمیت کا عکاس قرار دیا جا رہا ہے۔