ٹیلر سوئفٹ نے ’دی لائف آف اے شوگرل‘ کے توسیعی البم میں چار نئے گانوں کا اعلان کردیا

لاس اینجلس، 24 ستمبر, 2026 (نوشین): امریکی پاپ اسٹار ٹیلر سوئفٹ نے اپنے 12ویں اسٹوڈیو البم ’’دی لائف آف اے شوگرل‘‘ کے توسیعی ایڈیشن ’’دی لائف آف اے شوگرل: دی اینکور‘‘ کا اعلان کردیا ہے، جس میں چار نئے گانے شامل ہوں گے اور یہ ایڈیشن جمعہ کو ریلیز کیا جائے گا۔ ٹیلر سوئفٹ کے مطابق نئے گانے البم کی گزشتہ اکتوبر میں ریلیز کے بعد اس کی بڑی کامیابی کے تناظر میں تحریر کیے گئے، جب البم کے تمام 12 گانے بل بورڈ ہاٹ 100 کی ابتدائی 12 پوزیشنز میں شامل ہوگئے تھے۔ نئے ایڈیشن میں ’’پیشنٹ زیرو‘‘ کے علاوہ ’’کلیولینڈ!‘‘، ’’پنک کلاؤڈنگ‘‘ اور ’’بیبی لون‘‘ شامل ہیں۔ سوئفٹ نے بتایا کہ انہوں نے یہ گانے میکس مارٹن اور شیل بیک کے ساتھ سویڈن کے دورے کے دوران تحریر کیے، جہاں وہ ابتدا میں البم کی کامیابی کا جشن منانے گئی تھیں لیکن بعد میں دوبارہ اسٹوڈیو کا رخ کیا اور مزید موسیقی تخلیق کی۔ میکس مارٹن اور شیل بیک اس سے قبل بھی ٹیلر سوئفٹ کے کئی اسٹوڈیو البمز میں ان کے ساتھ کام کر چکے ہیں۔ نئے گانوں کا اعلان رواں ماہ ایمی ایوارڈز میں سوئفٹ کی ایک کامیڈی اسکیچ میں شرکت کے بعد سامنے آیا، جس کے بعد مداحوں میں ان کی نئی موسیقی کی ممکنہ ریلیز کے حوالے سے قیاس آرائیاں شروع ہوگئی تھیں۔ لومی نیٹ کے مطابق ’’دی لائف آف اے شوگرل‘‘ کے مرکزی گانے ’’دی فیٹ آف اوفیلیا‘‘ نے ریلیز کے پہلے ہفتے امریکا میں 9 کروڑ 25 لاکھ آفیشل اسٹریمز حاصل کیے۔