لارڈز ٹیسٹ سے قبل عمر گل کا بابر اعظم کی فٹنس پر اہم اپ ڈیٹ

لندن، 25 اگست 2026 (غفران): پاکستان کے باؤلنگ کوچ عمر گل نے انگلینڈ کے خلاف دوسرے ٹیسٹ سے قبل قومی ٹیم کے کپتان بابر اعظم کی انجری کے حوالے سے حوصلہ افزا اپ ڈیٹ دی ہے۔ دونوں ٹیموں کے درمیان دوسرا ٹیسٹ 27 اگست سے لارڈز کرکٹ گراؤنڈ میں شروع ہوگا۔میڈیا سے گفتگو کرتے ہوئے عمر گل نے بتایا کہ بابر اعظم نے بھرپور بیٹنگ سیشن میں حصہ لیا اور نیٹ پریکٹس کے دوران اسپنرز اور فاسٹ باؤلرز کا بھی سامنا کیا۔ عمر گل نے کہا، ’’بابر نے تھرو ڈاؤنز کی پریکٹس کی، بعد ازاں انہوں نے نیٹس میں اسپنرز اور فاسٹ باؤلرز کا بھی سامنا کیا۔‘‘ انہوں نے مزید کہا، ’’میرے خیال میں بابر بالکل بہتر نظر آ رہے ہیں۔ انہوں نے تینوں نیٹس میں بیٹنگ کی۔ ہمیں امید ہے کہ وہ دوسرے ٹیسٹ کے لیے دستیاب ہوں گے۔‘‘ باؤلنگ کوچ نے کہا کہ قومی ٹیم دوسرے ٹیسٹ کے لیے مکمل طور پر تیار ہے اور تمام کھلاڑی تاریخی لارڈز کرکٹ گراؤنڈ میں کھیلنے کے لیے پُرجوش ہیں۔ انہوں نے کہا، ’’ہم اگلے میچ کے لیے تیار ہیں اور پوری ٹیم اس کی منتظر ہے۔ ہر کھلاڑی لارڈز میں کھیلنے کے لیے بہت پرجوش ہے۔‘‘عمر گل نے پہلے ٹیسٹ میں پاکستان کی باؤلنگ کارکردگی پر بات کرتے ہوئے موسم کو بھی ایک اہم عنصر قرار دیا۔ ان کا کہنا تھا کہ موسمی حالات نے پاکستانی باؤلرز کی کارکردگی کو متاثر کیا۔ پاکستان اور انگلینڈ کے درمیان دوسرا ٹیسٹ 27 اگست سے لارڈز میں کھیلا جائے گا، جہاں قومی ٹیم پہلے ٹیسٹ کی کارکردگی کو بھلا کر بھرپور انداز میں واپسی کی کوشش کرے گی۔