یومِ آزادی کے موقع پر آئی ایس پی آر کا بلوچی ملی نغمہ ’’پاک اے وطن‘‘ جاری

راولپنڈی، 9 اگست 2026 (کامران راجا): انٹر سروسز پبلک ریلیشنز (آئی ایس پی آر) نے پاکستان کے یومِ آزادی کے موقع پر بلوچی زبان میں نیا ملی نغمہ ’’پاک اے وطن‘‘ جاری کر دیا۔ملی نغمے میں معروف بلوچ گلوکار اختر چنال نے اپنی منفرد روایتی گائیکی اور پُرجوش بلوچی شاعری کے ذریعے پاکستان سے اپنی گہری محبت اور وابستگی کا اظہار کیا ہے۔ملی نغمہ بلوچستان کے بھرپور ثقافتی ورثے کو قومی اتحاد اور حب الوطنی کے جذبے کے ساتھ خوبصورتی سے اجاگر کرتا ہے۔ اس کی دھن اور پُراثر بول بلوچستان کے عوام اور ملک کی قومی یکجہتی، سلامتی اور استحکام کے درمیان گہرے تعلق کو نمایاں کرتے ہیں۔نغمے میں یہ پیغام دیا گیا ہے کہ پاکستان محض ایک جغرافیائی خطہ نہیں بلکہ قومی شناخت کا لازمی حصہ ہے، جس کے لیے عوام ہر قربانی دینے کے عزم کے ساتھ متحد ہیں۔”پاک اے وطن‘‘ اپنی پُراثر دھن اور ثقافتی رنگ کے ذریعے ملک بھر میں اتحاد، یکجہتی اور بھائی چارے کا پیغام اجاگر کرتا ہے۔ملی نغمہ پاکستان سے اس لازوال محبت کو اجاگر کرتا ہے جو ملک کی ہر وادی، ہر زبان اور ہر دل میں یکساں طور پر موجود ہے، اور یومِ آزادی کے موقع پر قومی اتحاد کے جذبے کو مزید تقویت دیتا ہے۔