ٹوکیو، 7 اگست 2026 (نوشین): جاپانی حکام نے طاقتور طوفان ڈولفن کی آمد کے پیشِ نظر ملک کے جنوب مغربی علاقوں میں لاکھوں افراد کو محفوظ مقامات پر منتقل ہونے کی ہدایت جاری کر دی ہے، جبکہ خراب موسمی حالات کے باعث 500 سے زائد ملکی و بین الاقوامی پروازیں بھی منسوخ کر دی گئی ہیں۔پان کی محکمہ موسمیات (جے ایم اے) کے مطابق کیٹیگری ون کا طوفان ڈولفن 144 کلومیٹر فی گھنٹہ کی رفتار سے مسلسل ہوائیں چلا رہا ہے، جبکہ ہواؤں کے جھکڑ 198 کلومیٹر فی گھنٹہ تک پہنچ رہے ہیں۔ طوفان آہستہ آہستہ کیوشو اور اوکیناوا کے درمیان واقع جزیروں کی جانب بڑھ رہا ہے۔حکام نے احتیاطی تدابیر کے طور پر کاگوشیما اور اوکیناوا کے تقریباً 2 لاکھ 60 ہزار رہائشیوں کو انخلا کے احکامات جاری کیے ہیں۔ دوسری جانب ٹویوٹا موٹر کارپوریشن نے اپنے ملازمین کی حفاظت کے پیشِ نظر جمعہ کے روز اپنی 9 فیکٹریوں میں پیداوار عارضی طور پر معطل کر دی ہے۔
محکمہ موسمیات نے خبردار کیا ہے کہ طوفان اوکیناوا کے قریب پہنچتے ہوئے اپنی شدت برقرار رکھے گا، جس کے باعث تیز ہوائیں عمارتوں اور دیگر ڈھانچوں کو شدید نقصان پہنچا سکتی ہیں۔ ماہرین نے یہ بھی خبردار کیا ہے کہ شدید بارشوں اور گرج چمک پر مشتمل لکیری بارش کا سلسلہ بن سکتا ہے، جس سے اچانک سیلاب اور لینڈ سلائیڈنگ کا خطرہ بڑھ جائے گا۔طوفان کے اثرات کیوشو کے وسیع علاقوں، بالخصوص کوماموتو پریفیکچر تک بھی پہنچ رہے ہیں، جو گزشتہ ہفتے آنے والے 7.1 شدت کے زلزلے کے بعد اب بھی بحالی کے مرحلے میں ہے۔ زلزلے کے نتیجے میں متعدد مکانات تباہ ہونے کے باعث تقریباً 6,700 افراد اب بھی امدادی مراکز میں مقیم ہیں۔طوفان سے پیدا ہونے والے خطرات کے علاوہ محکمہ موسمیات نے شدید گرمی (ہیٹ اسٹروک) کے خدشے سے بھی خبردار کیا ہے، کیونکہ بعض علاقوں میں درجہ حرارت 36 ڈگری سینٹی گریڈ تک پہنچنے کی توقع ہے۔جاپانی حکام نے شہریوں پر زور دیا ہے کہ وہ انخلا کے سرکاری احکامات پر عمل کریں، موسمی صورتحال سے متعلق سرکاری اطلاعات پر نظر رکھیں اور طوفان ڈولفن کے پیشِ نظر تمام ضروری حفاظتی اقدامات اختیار کریں۔