اسلام آباد، 5 اگست 2026 (نوشین): نائب وزیراعظم و وزیر خارجہ سینیٹر محمد اسحاق ڈار نے اردن کا ایک روزہ سرکاری دورہ مکمل کر لیا، جہاں انہوں نے یروشلم سے متعلق وزارتی اجلاس میں شرکت کی اور مختلف ممالک کے وزرائے خارجہ سے دوطرفہ ملاقاتیں کیں۔ عمان میں اپنے قیام کے دوران سینیٹر اسحاق ڈار نے باہمی دلچسپی کے امور اور خطے کی موجودہ صورتحال پر تبادلہ خیال کیا۔ انہوں نے امن، استحکام اور فلسطینی عوام کے جائز حقوق کی حمایت کے حوالے سے پاکستان کے غیر متزلزل عزم کا اعادہ بھی کیا۔
عمان سے روانگی کے موقع پر اردن کی وزارت خارجہ و تارکین وطن کے انسانی حقوق ڈائریکٹوریٹ کی ڈائریکٹر محترمہ سجا المجالی، اردن میں پاکستان کے سفیر میجر جنرل (ر) خرم سرفراز خان اور پاکستانی سفارت خانے کے اعلیٰ حکام نے نائب وزیراعظم کو الوداع کیا۔ پاکستان واپسی سے قبل سینیٹر محمد اسحاق ڈار مدینہ منورہ میں مختصر قیام کریں گے۔ یروشلم سے متعلق وزارتی اجلاس میں ان کی شرکت اس بات کی عکاس ہے کہ پاکستان مسئلۂ فلسطین اور یروشلم شریف سے متعلق سفارتی کوششوں میں فعال کردار ادا کر رہا ہے اور فلسطینی عوام کے جائز اور قانونی حقوق کی مسلسل حمایت جاری رکھے ہوئے ہے۔