صنعاء، 5 نومبر 2026 (کامران راجہ): یمن میں سعودی فضائی حملوں اور گولہ باری کے نتیجے میں 12 گھنٹوں کے دوران کم از کم 24 افراد جاں بحق اور متعدد زخمی ہو گئے، جبکہ حملوں میں رہائشی علاقوں، طبی مراکز اور شہری تنصیبات کو نشانہ بنایا گیا۔ ایرانی خبر رساں ادارے پریس ٹی وی کے مطابق یمنی ٹیلی ویژن چینل المسیرہ اور مقامی ذرائع کا حوالہ دیتے ہوئے بتایا گیا کہ جمعرات کی علی الصبح جنوب مغربی صوبے تعز کے ضلع مقبنہ کے علاقے البرح میں سعودی فضائی حملے کے دوران ایک رہائشی مکان کو نشانہ بنایا گیا، جس کے نتیجے میں کم از کم سات افراد جاں بحق ہوئے، جن میں دو بچے بھی شامل ہیں، جبکہ خاندان کے چھ دیگر افراد زخمی ہو گئے۔ صوبہ صعدہ کے شمال مغربی علاقے میں بھی سعودی فورسز کی جانب سے ضلع شدا پر گولہ باری کے نتیجے میں ایک شہری جاں بحق ہوا۔ یمن کی وزارت صحت و آبادی نے جمعرات کی صبح بتایا کہ گزشتہ 12 گھنٹوں کے دوران ملک کے مختلف علاقوں میں سعودی فضائی حملوں کے نتیجے میں ابتدائی طور پر 12 افراد جاں بحق اور 15 زخمی ہوئے، جن میں زیادہ تر خواتین اور بچے شامل تھے۔ تعز میں سعودی فضائی حملوں کے دوران دو خاندانوں کے گھروں کو بھی نشانہ بنایا گیا، جس کے بعد مقامی افراد نے ملبے تلے دبے افراد کو تلاش کرنے اور زخمیوں کو اسپتال منتقل کرنے کے لیے امدادی کارروائیاں کیں۔ ضلع ماویہ کے گاؤں المعیتب میں ایک اور فضائی حملے میں رہائشی مکانات کو نشانہ بنایا گیا، جس سے ایک مرد اور ایک خاتون زخمی ہوئے، متعدد گھروں کو نقصان پہنچا اور مسافر گاڑیوں میں آگ لگ گئی۔ پریس ٹی وی کے مطابق سعودی جنگی طیاروں نے ضلع الصلو اور حیفان میں دو طبی مراکز کو بھی نشانہ بنایا، جبکہ الزربی اور ذی سمیر کے علاقوں میں دو مساجد اور ایک عوامی سڑک پر بھی حملے کیے گئے۔ دوسری جانب صوبہ صعدہ کے ضلع حیدان کے علاقے مران میں سعودی لڑاکا طیاروں نے مواصلاتی نظام کو نشانہ بنایا، جس کے نتیجے میں دو مواصلاتی ٹاورز، ایک بجلی کا جنریٹر اور مرمت کی تنصیبات تباہ ہو گئیں، جبکہ مقامی آبادی کا مواصلاتی رابطہ بھی متاثر ہوا۔ یمن میں تازہ حملے ایسے وقت میں کیے گئے ہیں جب ملک بھر میں شہری ہلاکتوں اور بنیادی ڈھانچے کو پہنچنے والے نقصان کی اطلاعات مسلسل سامنے آ رہی ہیں۔ دوسری جانب سعودی قیادت میں قائم اتحاد نے دعویٰ کیا ہے کہ مدینہ ریجن کی جانب فائر کیا جانے والا حوثی میزائل فضا میں ہی تباہ کر دیا گیا۔