اسلام آباد، 12 اکتوبر 2026 (غفران): گورنر خیبر پختونخوا فیصل کریم کنڈی نے صوبے میں صدارتی فرمان کا خیرمقدم کرتے ہوئے کہا ہے کہ خیبر پختونخوا کے عوام امن، استحکام، ترقی اور خوشحالی چاہتے ہیں۔ گورنر ہاؤس سے جاری بیان میں انہوں نے کہا کہ صوبے کے عوام فیصلہ کر چکے ہیں کہ وہ اب خوارج کی حمایت نہیں کریں گے بلکہ دہشت گردی کے مکمل خاتمے تک سکیورٹی فورسز کے ساتھ کھڑے رہیں گے۔ فیصل کریم کنڈی نے کہا کہ خیبر پختونخوا کے عوام انتشار اور بدامنی کے بجائے ایک پُرامن اور خوشحال مستقبل کے خواہاں ہیں۔ انہوں نے مزید کہا کہ صوبہ ملک کے دیگر حصوں کے ساتھ برادرانہ تعلقات اور باہمی تعاون کو بھی فروغ دینا چاہتا ہے۔ گورنر کے مطابق تجربات کے تبادلے، مشترکہ کوششوں اور صوبوں کے درمیان تعاون کے ذریعے ترقی اور خوشحالی حاصل کی جا سکتی ہے۔ خیبر پختونخوا کے عوام کی پُرامن فطرت پر زور دیتے ہوئے انہوں نے کہا کہ صوبے کے عوام نے کبھی دہشت گردی یا تشدد کی حمایت نہیں کی۔ فیصل کریم کنڈی نے عوام پر زور دیا کہ وہ قانون شکنی، تشدد پر اکسانے اور ہنگامہ آرائی سے گریز کریں۔ انہوں نے خبردار کیا کہ امن و امان خراب کرنے یا قانون کو ہاتھ میں لینے کی کوشش کرنے والوں کے خلاف سخت کارروائی کی جائے گی۔