لاہور، 6 اکتوبر 2026 (نوشین): پنجاب حکومت نے صوبے بھر میں سیکیورٹی خدشات کے پیش نظر 10 روز کے لیے دفعہ 144 نافذ کر دی، جس کے تحت 5 یا اس سے زائد افراد کے اجتماع پر پابندی عائد کر دی گئی ہے۔ حکومت کے مطابق پنجاب کو دہشت گرد تنظیموں اور دشمن انٹیلی جنس ایجنسیوں کی جانب سے عوامی امن، زندگی اور املاک کی سلامتی کے حوالے سے سنگین اور فوری خطرات لاحق ہیں۔ یہ فیصلہ ایک روز بعد کیا گیا ہے جب پاکستان تحریک انصاف کا لانگ مارچ کوہاٹ پہنچا، جس کی قیادت خیبرپختونخوا کے وزیراعلیٰ سہیل آفریدی کر رہے ہیں اور قافلہ اسلام آباد کی جانب رواں دواں ہے۔ پنجاب محکمہ داخلہ کی جانب سے جاری نوٹیفکیشن کے مطابق پابندیاں ضابطہ فوجداری 1898 کی دفعہ 144 کی شق 6 کے تحت نافذ کی گئی ہیں۔ نوٹیفکیشن میں کہا گیا ہے کہ قانون نافذ کرنے والے اداروں اور انٹیلی جنس ایجنسیوں کی جانب سے موصول ہونے والی معتبر اطلاعات کے مطابق صوبے بھر میں دہشت گرد تنظیموں اور دشمن انٹیلی جنس ایجنسیوں سے سنگین اور فوری خطرہ موجود ہے۔ حکام کے مطابق بڑے عوامی اجتماعات کے دوران خودکش حملہ آوروں، گاڑیوں میں نصب دیسی ساختہ دھماکا خیز آلات اور ٹارگٹ کلنگ سے متعلق متعدد خطرے کے الرٹس بھی موصول ہوئے ہیں۔