اسلام آباد، 26 جنوری2025 (کامران راجہ) : پاک بحریہ 7 سے 11 فروری تک کثیر القومی مشق “امن” کے نویں ایڈیشن کی میزبانی کے لیے تیار ہے۔ امن 2025 مشق کی خاص بات امن ڈائیلاگ ہو گا؛ جہاں دنیا بھر سے بحری افواج کے سربراہان اور کوسٹ گارڈز کے اعلی ترین قیادت؛ علاقائی میری ٹائم سیکیورٹی اور بحری خطرات کے خلاف مشترکہ حکمت عملی پر تبادلہ خیال کریں گے۔
امن 2025 میں دنیا بھر سے کم و بیش 60 ممالک اپنے بحری جہازوں، ہوائی جہازوں، اسپیشل آپریشنز فورسز، میرینز ٹیموں اور مبصرین کے ساتھ شرکت کریں گے۔
پاک بحریہ 2007 سے ہر دو سال بعد کثیر القومی بحری مشق “امن” کا انعقاد کر رہی ہے۔2007 میں امن کے افتتاحی ایڈیشن میں 28 ممالک نے حصہ لیا جبکہ 2023 میں امن مشق کے 9ویں ایڈیشن میں 50 ممالک نے شرکت کی۔ “امن” مشق کا مقصد علاقائی امن اور تعاون کو فروغ دینا ہے۔ یہ مشق دو مرحلوں پر مشتمل ہو گی۔ پہلے مرحلے کے دوران سیمینارز، آپریشنل مباحثے، انسداد دہشت گردی کے مظاہرے، بین الاقوامی اجتماعات اور سمندر میں مشق کی پلاننگ جیسی سرگرمیاں منعقد کی جائیں گیں۔
سمندری مرحلے میں بحری حکمت عملی اور بحری سلامتی سے متعلق مشقیں جیسے کہ انسداد قزاقی اور انسداد دہشت گردی، سرچ اینڈ ریسکیو، فائرنگ اور فضائی دفاع کی مشقیں شامل ہوں گیں۔ سمندری مرحلے کی خاص بات بین الاقوامی فلیٹ ریویو ہوگا۔