مسقط، 12 نومبر 2026 (کامران راجہ): دفاعی چیمپئن پاکستان نے انڈر 19 ایشیا کپ 2026 کے پہلے سیمی فائنل میں بنگلہ دیش کو یکطرفہ مقابلے کے بعد 9 وکٹوں سے شکست دے کر فائنل کے لیے کوالیفائی کر لیا۔ جمعرات کو عمان کے شہر مسقط کے ال امارات کرکٹ گراؤنڈ میں کھیلے گئے میچ میں فاسٹ باؤلر رضوان اللہ کی پانچ وکٹوں اور حائم خان اور عثمان خان کی شاندار نصف سنچریوں نے پاکستان کی کامیابی میں اہم کردار ادا کیا۔ 139 رنز کے ہدف کے تعاقب میں پاکستانی ٹیم نے صرف 21.5 اوورز میں ایک وکٹ کے نقصان پر 140 رنز بنا کر کامیابی حاصل کر لی۔ اوپنرز حائم خان اور عثمان خان نے جارحانہ بیٹنگ کا مظاہرہ کرتے ہوئے بنگلہ دیشی باؤلرز کو دباؤ میں رکھا اور ٹیم کو 100 رنز سے آگے پہنچایا۔ حائم خان 72 گیندوں پر 69 رنز بنا کر آؤٹ ہوئے، ان کی اننگز میں آٹھ چوکے اور ایک چھکا شامل تھا۔ عثمان خان نے ناقابل شکست رہتے ہوئے 54 گیندوں پر 64 رنز بنائے، جس میں سات چوکے اور دو چھکے شامل تھے، جبکہ عبدالقادر نے ناٹ آؤٹ 8 رنز بنا کر ٹیم کو فتح سے ہمکنار کیا۔ اس سے قبل بنگلہ دیش کی ٹیم پاکستانی باؤلرز کی عمدہ کارکردگی کے باعث 31.4 اوورز میں 138 رنز بنا کر آؤٹ ہوگئی۔ بنگلہ دیش کی جانب سے اوپنر عبداللہ المہی 45 گیندوں پر 50 رنز بنا کر نمایاں رہے، ان کی اننگز میں چار چوکے اور دو چھکے شامل تھے۔ رقیب الحسن نے 39 گیندوں پر 26 جبکہ آل رفیع نے 22 گیندوں پر 20 رنز بنائے۔ بنگلہ دیش کے کپتان فرید حسن 17 رنز بنا سکے جبکہ دیگر بلے باز پاکستانی باؤلنگ کے سامنے زیادہ دیر مزاحمت نہ کر سکے۔ پاکستان کی جانب سے رضوان اللہ نے شاندار باؤلنگ کرتے ہوئے آٹھ اوورز میں 30 رنز دے کر پانچ کھلاڑیوں کو آؤٹ کیا۔ محمد سیام، علی رضا، حسنین عباس ڈار اور احمد حسین نے ایک، ایک وکٹ حاصل کی۔ اس شاندار کامیابی کے ساتھ پاکستان نے انڈر 19 ایشیا کپ کے فائنل میں جگہ بنا لی ہے اور ٹائٹل کے کامیاب دفاع کی جانب ایک اور قدم بڑھا دیا ہے۔