اسلام آباد، 4 نومبر 2026 (نوشین): پاکستان فٹ بال فیڈریشن (پی ایف ایف) نے اے ایف سی انڈر 17 ایشین کپ 2027 کے کوالیفائرز کے لیے 23 رکنی قومی اسکواڈ کا اعلان کردیا ہے، جو 8 سے 20 نومبر تک لاؤس میں منعقد ہوں گے۔ منتخب کھلاڑیوں نے حال ہی میں اختتام پذیر ہونے والی نیشنل انڈر 17 فٹ بال چیمپئن شپ 2026 میں شاندار کارکردگی کا مظاہرہ کرتے ہوئے قومی ٹیم میں جگہ بنائی، جس میں ملک بھر سے نوجوان فٹ بالرز نے شرکت کی تھی۔ پی ایف ایف کے مطابق چیمپئن شپ نوجوان کھلاڑیوں کی صلاحیتوں کو جانچنے اور میرٹ کی بنیاد پر قومی ٹیم کے لیے انتخاب کا ایک مسابقتی پلیٹ فارم ثابت ہوئی۔ فیڈریشن کا کہنا ہے کہ اس انتخاب سے نوجوان فٹ بال کے فروغ، نچلی سطح پر کھیل کی ترقی اور ابھرتے ہوئے کھلاڑیوں کو بین الاقوامی سطح پر اپنی صلاحیتیں منوانے کے مواقع فراہم کرنے کے عزم کی عکاسی ہوتی ہے۔ ہیڈ کوچ محمد حبیب کوالیفائرز کے گروپ ڈی میں نوجوان شاہینز کی قیادت کریں گے، جہاں پاکستان کا مقابلہ ایران، اردن، میزبان لاؤس اور سری لنکا سے ہوگا۔ 23 رکنی اسکواڈ میں تین گول کیپرز، آٹھ ڈیفنڈرز، سات مڈفیلڈرز اور پانچ فارورڈز شامل ہیں۔ قومی ٹیم ایونٹ میں اپنی ملکی سطح کی کارکردگی کو بین الاقوامی میدان میں برقرار رکھتے ہوئے اے ایف سی انڈر 17 ایشین کپ 2027 کے لیے کوالیفائی کرنے کی کوشش کرے گی۔