اسلام آباد، 8 نومبر 2026 (نوشین): وزیراعظم شہباز شریف نے آذربائیجان کے یومِ فتح کی چھٹی سالگرہ کے موقع پر صدر الہام علیوف اور برادر ملک کے عوام کو دلی مبارکباد پیش کرتے ہوئے پاکستان کی غیر متزلزل حمایت اور دوطرفہ تعلقات کو مزید مضبوط بنانے کے عزم کا اعادہ کیا ہے۔ اپنے تہنیتی پیغام میں وزیراعظم نے 8 نومبر کو آذربائیجان کی تاریخ کا ایک اہم سنگِ میل قرار دیتے ہوئے کہا کہ یہ دن آذربائیجانی قوم کی جرأت، عزم اور عظیم قربانیوں کی یاد دلاتا ہے۔ انہوں نے کہا کہ آذربائیجان نے تقریباً تین دہائیوں بعد اپنی علاقائی سالمیت بحال کی، جو اس کے شہداء کی بے مثال قربانیوں کا نتیجہ ہے۔ وزیراعظم شہباز شریف نے آذربائیجان کے شہداء کو خراجِ عقیدت پیش کرتے ہوئے کہا کہ پاکستان مشکل وقت میں بھی آذربائیجان کے ساتھ کھڑا تھا اور مستقبل میں بھی اس کی حمایت جاری رکھے گا۔ انہوں نے کہا کہ پاکستان اور آذربائیجان کے درمیان دوستی اور برادرانہ تعلقات ناقابلِ شکست ہیں اور باہمی اعتماد و یکجہتی پر استوار ہیں۔ وزیراعظم نے گزشتہ سال باکو میں صدر الہام علیوف کے ہمراہ یومِ فتح کی پریڈ میں شرکت کا ذکر کرتے ہوئے کہا کہ اس تقریب میں شرکت ان کے لیے باعثِ اعزاز تھی اور یہ پریڈ دونوں ممالک کے درمیان مضبوط اور دیرینہ تعلقات کی عکاس تھی۔ انہوں نے آذربائیجان کی مزید ترقی اور خوشحالی کے لیے نیک خواہشات کا اظہار کرتے ہوئے امید ظاہر کی کہ جنوبی قفقاز کا خطہ پائیدار امن، استحکام اور مشترکہ خوشحالی کی جانب گامزن ہوگا۔ وزیراعظم نے اپنے پیغام میں پاکستان اور آذربائیجان کے درمیان دیرینہ دوستی اور تعاون کو مزید فروغ دینے کے عزم کا بھی اعادہ کیا۔