راولپنڈی، 19 اگست 2026 (نوشین): راولپنڈی اور اسلام آباد میں بارش کا سلسلہ رکنے کے بعد نالہ لئی میں سیلاب کا خطرہ کم ہو گیا ہے، جبکہ دن کے دوران 22 فٹ سے زائد کی بلند ترین سطح پر پہنچنے کے بعد پانی کی سطح میں تیزی سے کمی آ رہی ہے۔فلڈ کنٹرول روم کے مطابق کٹاریان کے مقام پر پانی کی سطح 21 فٹ سے کم ہو کر 17 فٹ رہ گئی ہے، جبکہ گوالمنڈی پل کے مقام پر بھی پانی کی سطح 17 فٹ ریکارڈ کی گئی۔ پانی کی سطح میں کمی سے شہریوں نے سکھ کا سانس لیا، کیونکہ اس سے قبل ریسکیو 1122 نے نالہ لئی کے اطراف خطرے کے سائرن بجا کر شہریوں کو خبردار کیا تھا۔اس سے قبل ضلعی انتظامیہ کے حکام نے بتایا تھا کہ کٹاریان کے مقام پر پانی کی سطح 22 فٹ سے تجاوز کر گئی تھی جبکہ گوالمنڈی پل کے قریب یہ سطح 16 فٹ تک پہنچ گئی تھی۔ شدید بارش کے باعث پانی کی سطح میں نمایاں اضافہ ہوا، اس سے قبل کٹاریان اور گوالمنڈی کے مقامات پر پانی کی سطح بالترتیب 19 اور 15 فٹ ریکارڈ کی گئی تھی۔
ریسکیو 1122 نے نالہ لئی کے اطراف کے علاقوں میں اعلانات کرتے ہوئے شہریوں کو غیر ضروری سفر سے گریز اور پانی کی سطح میں اضافے کے پیش نظر انتہائی احتیاط برتنے کی ہدایت کی۔ریسکیو حکام نے شہریوں کو یہ بھی ہدایت کی کہ بارش کے دوران بچوں کو برساتی نالوں اور بجلی کے کھمبوں سے دور رکھیں تاکہ حادثات سے بچا جا سکے۔ حکام نے نالہ لئی کے کنارے آباد آبادیوں کو پانی کی سطح میں اضافے کے پیش نظر حفاظتی ہدایات بھی جاری کیں۔ جڑواں شہروں میں پیر کی رات سے وقفے وقفے سے بارش کا سلسلہ جاری رہا۔ تازہ ترین اعداد و شمار کے مطابق سیدپور میں 66 ملی میٹر، بوکرا میں 65 ملی میٹر اور پیرودھائی میں 63 ملی میٹر بارش ریکارڈ کی گئی، جبکہ گولڑہ میں 52 ملی میٹر، شمس آباد میں 50 ملی میٹر اور چکلالہ میں 47 ملی میٹر بارش ہوئی۔