راولپنڈی09 اپریل 2026 (کامران راجہ): سٹی پولیس آفیسر (سی پی او) سید خالد محمود ہمدانی کے احکامات کے مطابق غیر ملکی وفود کی آمدورفت کے پیش نظر راولپنڈی پولیس نے شہر بھر میں سکیورٹی ہائی الرٹ کر دی ہے اور غیرمعمولی اقدامات کے تحت فول پروف سکیورٹی کو یقینی بنایا جا رہا ہے۔
سی پی او راولپنڈی، ڈی پی او چکوال، ڈی پی او مری، ایس ایس پی آپریشنز، ایس ایس پی انویسٹیگیشن، چیف ٹریفک آفیسر، ڈویژنل ایس پیز، ایس ڈی پی اوز اور دیگر سینئر افسران خود فیلڈ میں موجود رہ کر سکیورٹی ڈیوٹیز کی نگرانی کر رہے ہیں۔
راولپنڈی پولیس کے 5 ہزار سے زائد افسران و اہلکار سکیورٹی کے فرائض سرانجام دے رہے ہیں، جبکہ 350 سے زائد سپیشل پکٹس قائم کیے گئے ہیں۔ شہر کے تمام داخلی و خارجی راستوں پر کڑی نگرانی جاری ہے اور اہم شاہراہوں پر اضافی نفری تعینات کی گئی ہے۔
سی پی او راولپنڈی کی زیر صدارت پولیس لائنز ہیڈکوارٹرز میں اعلیٰ سطحی اجلاس منعقد ہوا جس میں فول پروف سکیورٹی کو ہر صورت یقینی بنانے کے احکامات جاری کیے گئے۔ اجلاس میں ڈی پی او چکوال، ڈی پی او مری، ایس ایس پی آپریشنز، ایس ایس پی انویسٹیگیشن، چیف ٹریفک آفیسر، ڈویژنل ایس پیز، ایس ڈی پی اوز اور دیگر افسران نے شرکت کی۔
ایلیٹ فورس، ڈولفن فورس، تھانوں کی موبائلز اور دیگر کوئیک رسپانس یونٹس کی ٹیمیں الرٹ گشت پر مامور ہیں۔
سکیورٹی وجوہات کی بنا پر شہر کے داخلی و خارجی راستوں، اہم شاہراہوں، مارکیٹس، دکانوں اور ہوٹلز کو عارضی طور پر بند کر کے سخت سکیورٹی تعینات کی گئی ہے جبکہ بس اڈوں کو بھی عارضی طور پر بند کر کے سخت چیکنگ کا نظام نافذ کیا گیا ہے۔
شہر بھر میں سرچ، سویپ، کومبنگ اور انٹیلی جنس بیسڈ آپریشنز میں مزید تیزی لائی گئی ہے اور مشتبہ افراد کی کڑی نگرانی کی جا رہی ہے۔ حساس تنصیبات، اہم سرکاری و نجی مقامات اور قیام گاہوں کے اطراف سکیورٹی مزید سخت کر دی گئی ہے۔
سیف سٹی، سی سی ٹی وی کیمروں اور جدید ٹیکنالوجی کے ذریعے چوبیس گھنٹے مانیٹرنگ کی جا رہی ہے جبکہ کنٹرول روم سے لمحہ بہ لمحہ صورتحال کی نگرانی جاری ہے۔
ٹریفک کی روانی برقرار رکھنے کے لیے خصوصی ٹریفک پلان تشکیل دیا گیا ہے اور شہریوں کی سہولت کے لیے متبادل راستے فراہم کیے گئے ہیں۔
سی پی او راولپنڈی سید خالد محمود ہمدانی نے کہا کہ عوام کے جان و مال کے تحفظ اور فول پروف سکیورٹی کو یقینی بنانے کے لیے تمام وسائل بروئے کار لائے جا رہے ہیں۔