اسلام آباد، 9 نومبر 2026 (نوشین): پاکستانی فلمی موسیقی کے نامور گلوکار اے نئیر کو مداحوں سے بچھڑے دس برس بیت گئے، تاہم ان کی سریلی آواز اور لازوال گیت آج بھی موسیقی کے شائقین کے دلوں میں زندہ ہیں۔ اے نئیر کا اصل نام آرتھر نئیر تھا اور وہ 17 ستمبر 1950 کو ساہیوال کے قریب گاؤں رانسن آباد میں پیدا ہوئے۔ انہوں نے 1974 میں فلم ’’بہشت‘‘ سے اپنے فلمی گلوکاری کے سفر کا آغاز کیا، تاہم گلوکارہ ناہید اختر کے ساتھ گایا گیا گیت ’’پیار تو اک دن ہونا تھا‘‘ ان کی شہرت کا اہم سنگ میل ثابت ہوا۔ 1980 کی دہائی میں اے نئیر کی آواز پاکستانی فلمی موسیقی پر چھائی رہی اور ان کے گیت اداکار ندیم، شاہد اور وحید مراد سمیت کئی نامور فنکاروں پر فلمائے گئے۔ ان کے مقبول گیتوں میں ’’جنگل میں منگل تیرے ہی دم سے‘‘، ’’ایک بات کہوں دلدار‘‘، ’’ساتھی مجھے مل گیا‘‘ اور ’’دلدارا‘‘ شامل ہیں، جو آج بھی موسیقی کے شائقین میں مقبول ہیں۔ اے نئیر نے اپنے فنی کیریئر کے دوران چار ہزار سے زائد فلمی گیت گائے اور بہترین گلوکاری پر پانچ مرتبہ نگار ایوارڈ حاصل کیے، جبکہ حکومت پاکستان نے موسیقی کے شعبے میں ان کی خدمات کے اعتراف میں انہیں صدارتی تمغہ برائے حسن کارکردگی سے بھی نوازا۔ وہ 11 نومبر 2016 کو دل کا دورہ پڑنے کے باعث لاہور میں انتقال کر گئے، تاہم ان کی آواز اور یادگار گیت آج بھی پاکستانی فلمی موسیقی کے سنہری دور کی یاد دلاتے ہیں۔