راولپنڈی، 5 نومبر 2026 (کامران راجہ): چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نشانِ امتیاز (ملٹری)، ہلالِ امتیاز (ملٹری) نے جمعرات کو اسپیشل سروسز گروپ (ایس ایس جی) ہیڈکوارٹرز تربیلا کا دورہ کیا، جہاں انہیں ایلیٹ فورس کی تربیت، پیشہ ورانہ صلاحیتوں اور آپریشنل تیاریوں کے حوالے سے بریفنگ دی گئی۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے یادگارِ شہداء پر پھولوں کی چادر چڑھائی اور فاتحہ خوانی کی، جبکہ مادرِ وطن کے دفاع میں جانوں کا نذرانہ پیش کرنے والے ایس ایس جی کے شہداء کو خراجِ عقیدت پیش کیا۔ دورے کے دوران آرمی چیف کو ایس ایس جی کی خصوصی تربیت، آپریشنل تیاریوں اور مختلف مشنز کی انجام دہی کے لیے استعدادِ کار سے متعلق تفصیلی بریفنگ دی گئی۔ انہوں نے جدید ترین خصوصی آلات کا معائنہ بھی کیا اور ایک عملی مظاہرے کا مشاہدہ کیا، جس میں ایس ایس جی کے جوانوں نے خصوصی آپریشنز کے دوران اپنی جنگی مہارت، پھرتی اور پیشہ ورانہ صلاحیتوں کا مظاہرہ کیا۔ افسران اور جوانوں سے گفتگو کرتے ہوئے فیلڈ مارشل عاصم منیر نے ان کی پیشہ ورانہ مہارت، بلند حوصلے اور فرائض سے غیر متزلزل وابستگی کو سراہا۔ انہوں نے اس بات پر زور دیا کہ بدلتے ہوئے سکیورٹی خطرات اور نئے چیلنجز کا مؤثر مقابلہ کرنے اور برتری برقرار رکھنے کے لیے مسلسل تربیت، مقامی سطح پر دفاعی صلاحیتوں کی ترقی اور آپریشنل تیاریوں پر غیر متزلزل توجہ ناگزیر ہے۔ قبل ازیں ایس ایس جی ہیڈکوارٹرز پہنچنے پر اسپیشل سروسز گروپ کے جنرل آفیسر کمانڈنگ نے آرمی چیف کا استقبال کیا۔