ریاض، 6 اکتوبر 2026 (کامران راجہ): سعودی عرب نے کہا ہے کہ ایک روز قبل ملک کے جنوبی علاقوں میں دو ہوائی اڈوں کو نشانہ بنانے والے حملوں میں 3 افراد معمولی زخمی ہوئے جبکہ املاک کو بھی نقصان پہنچا۔ جنرل اتھارٹی آف سول ایوی ایشن کے مطابق جازان میں کنگ عبداللہ بن عبدالعزیز انٹرنیشنل ایئرپورٹ اور نجران انٹرنیشنل ایئرپورٹ کی تنصیبات کو نشانہ بنایا گیا۔ ہنگامی امدادی ٹیموں اور متعلقہ اداروں نے فوری طور پر کارروائی کرتے ہوئے زخمیوں کو طبی امداد کے لیے اسپتال منتقل کیا۔ حکام نقصانات کا جائزہ لینے اور مسافروں، ملازمین اور ملک کے شہری ہوابازی کے نظام کی حفاظت یقینی بنانے کے لیے ضروری اقدامات کر رہے ہیں۔ سعودی حکام نے حملوں کے ذمہ دار گروہ کا باضابطہ طور پر نام نہیں لیا، تاہم یمن کے حوثی گروپ نے پیر کے روز سعودی عرب کے مختلف علاقوں میں میزائل اور ڈرون حملوں کی ذمہ داری قبول کی تھی، جن میں جازان، نجران، ریاض کے کنگ خالد انٹرنیشنل ایئرپورٹ، ابہا ایئرپورٹ، رابغ میں آرامکو ریفائنری اور متعدد فوجی تنصیبات کو نشانہ بنانے کا دعویٰ کیا گیا۔ دوسری جانب یمن میں سعودی قیادت میں قائم اتحاد نے کہا کہ اس کی افواج نے شمال مغربی صوبہ صعدہ میں ایک ایسے ڈپو کو تباہ کر دیا جہاں 20 بیلسٹک میزائل موجود تھے، جبکہ صنعاء میں ایک بیلسٹک میزائل لانچنگ سائٹ کو بھی نشانہ بنایا گیا۔ اتحاد کے ترجمان ترکی المالکی کے مطابق مغربی یمن کے صوبہ الحدیدہ میں اسلحہ ڈپو، دھماکا خیز مواد سے لدی کشتیوں کے ذخیرہ کرنے کی جگہوں اور بحری بارودی سرنگوں کو بھی تباہ کیا گیا جبکہ جنوبی بحیرہ احمر کی آبی گزرگاہوں کے خلاف ممکنہ حملوں کی تیاریاں بھی ناکام بنا دی گئیں۔ یہ صورتحال یمن میں بڑھتی ہوئی کشیدگی کے دوران سامنے آئی ہے جہاں حوثیوں کی جانب سے 2014 میں صنعاء پر قبضے اور اس کے بعد 2015 میں سعودی قیادت میں فوجی مداخلت کے بعد سے تنازع جاری ہے۔