راولپنڈی، 21 اگست 2026 (کامران راجہ): چیف آف آرمی اسٹاف اور چیف آف ڈیفنس فورسز (سی ڈی ایف) فیلڈ مارشل سید عاصم منیر نے کہا ہے کہ بلوچستان کو غیر مستحکم کرنے کے دشمن عزائم کو قوم کے اجتماعی عزم اور ریاست کے غیر متزلزل، پُرعزم اور فیصلہ کن ردعمل سے ناکام بنایا جائے گا۔ فیلڈ مارشل نے بلوچستان کی ممتاز شخصیات اور سیاسی قیادت سے ملاقات کے دوران اظہار خیال کرتے ہوئے کہا کہ فتنہ الخوارج اور فتنہ الہندوستان دشمن عناصر کے غیر ملکی سرپرستی میں کام کرنے والے پراکسیز ہیں، جنہیں بلوچستان کو غیر مستحکم کرنے، اس کی ترقی میں رکاوٹ ڈالنے اور ریاست و عوام کے درمیان خلیج پیدا کرنے کے لیے استعمال کیا جا رہا ہے۔ ملاقات کے دوران چیف آف آرمی اسٹاف اور چیف آف ڈیفنس فورسز فیلڈ مارشل عاصم منیر نے واضح کیا کہ بلوچستان اور پاکستان کا حال اور مستقبل ایک دوسرے سے جڑا ہوا اور ناقابلِ تفریق ہے۔ انہوں نے کہا کہ بلوچستان باصلاحیت، ثابت قدم، محب وطن اور باوقار عوام سے مالا مال ہے۔انہوں نے زور دیا کہ واضح قومی بیانیہ، پائیدار امن اور استحکام صوبے کی حقیقی معاشی صلاحیت کو بروئے کار لانے، سرمایہ کاری کو راغب کرنے اور اس کے وسیع انسانی و قدرتی وسائل کو عوام کی حقیقی خوشحالی میں تبدیل کرنے کے لیے بنیادی اہمیت رکھتے ہیں۔ فیلڈ مارشل نے کہا کہ بلوچستان کے نوجوانوں میں صلاحیت اور مواقع کی کوئی کمی نہیں، وہ معاشرے کا سب سے متحرک اور باصلاحیت طبقہ ہیں۔ انہوں نے کہا کہ نوجوانوں کو بااختیار بنانا اور انہیں ملکی ترقی میں کردار ادا کرنے کے مواقع فراہم کرنا پائیدار ترقی کے لیے بنیادی اہمیت رکھتا ہے۔

فیلڈ مارشل سید عاصم منیر نے بلوچستان کی ممتاز شخصیات اور سماجی رہنماؤں کے امن کے فروغ، سماجی ہم آہنگی کے استحکام اور مثبت قومی بیانیے کے فروغ میں کردار کو سراہا۔ انہوں نے کہا کہ دشمن پروپیگنڈے کا جامع اور بلاجھجک مقابلہ، جھوٹے بیانیوں کو بے نقاب کرنا اور بلوچستان و اس کے عوام کی حقیقی صلاحیت، ترقی اور خواہشات کو اجاگر کرنا ضروری ہے۔ انہوں نے واضح کیا کہ بلوچستان کی تقدیر صرف بلوچستان کے عوام کے ہاتھ میں ہے۔ بلوچستان کی ممتاز شخصیات اور شرکاء نے بلوچستان اور پاکستان میں امن، ترقی اور خوشحالی کے عزم کا اعادہ کیا۔ انہوں نے امن و استحکام کو درپیش تمام غیر ملکی سرپرستی میں ہونے والے خطرات کے خلاف ریاست اور مسلح افواج کے شانہ بشانہ کھڑے رہنے کے عزم کا اظہار کیا۔ شرکاء نے عوامی مرکزیت پر مبنی ترقی کے لیے اپنا کردار ادا کرنے کے عزم کا بھی اظہار کیا، جس کے نتیجے میں ایک پُرامن، مستحکم اور خوشحال بلوچستان تشکیل پائے گا، جہاں سچ کی فتح ہو اور دشمن عناصر کے منفی بیانیے اور پروپیگنڈے کو بے نقاب اور ناکام بنایا جا سکے۔