لاہور، 7 اکتوبر 2026 (نیوز ڈیسک): پاکستان کی سینئر اداکارہ بشریٰ انصاری نے انکشاف کیا ہے کہ ان کی عمر 70 سال ہے اور انہوں نے کبھی اپنی عمر بتانے میں شرمندگی محسوس نہیں کی بلکہ ہمیشہ اسے کھلے عام بیان کیا ہے۔ ایک حالیہ تقریب میں گفتگو کرتے ہوئے سینئر اداکارہ نے کہا کہ وہ فخر سے لوگوں کو بتاتی ہیں کہ انہوں نے زندگی کے 70 سال مکمل کر لیے ہیں اور انہوں نے کبھی اپنی عمر چھپانے کی کوشش نہیں کی۔ بشریٰ انصاری نے ایک واقعہ یاد کرتے ہوئے بتایا کہ کسی نے ان سے پوچھا کہ وہ اپنی عمر کھل کر کیوں بتاتی ہیں، جس پر انہوں نے مزاحیہ انداز میں جواب دیا کہ ان کی ایسی فلمیں نہیں چل رہیں جن کی وجہ سے انہیں اپنی عمر چھپانے کی ضرورت پڑے۔ انہوں نے کہا کہ اگر وہ اپنی اصل عمر سے کم نظر آتی ہیں تو یہ اچھی بات ہے، اور 70 سال کی عمر میں 50 سال کی دکھائی دینا مثبت چیز سمجھا جانا چاہیے۔ بشریٰ انصاری نے مزید بتایا کہ انہوں نے زندگی بھر اپنا وزن کم رکھا۔ ان کا کہنا تھا کہ چونکہ ان کا تعلق پنجاب سے ہے، اس لیے لوگ اکثر انہیں دبلی اور کمزور قرار دیتے تھے، تاہم اب وہ سمجھتی ہیں کہ کم وزن برقرار رکھنا ان کے لیے فائدہ مند ثابت ہوا ہے۔