اسلام آباد، 10 نومبر 2026 (غفران): کابینہ کمیٹی برائے سرکاری اداروں نے نیشنل انجینئرنگ سروسز پاکستان (نیسپاک) میں چیئرمین یا آزاد ڈائریکٹر کی تقرری، حیدرآباد الیکٹرک سپلائی کمپنی (حیسکو) کے بورڈ کی ازسرنو تشکیل اور سکھر الیکٹرک پاور کمپنی (سیپکو) کے بورڈ میں آزاد ڈائریکٹر کی تقرری سے متعلق تجاویز کی منظوری دے دی۔ یہ فیصلے وفاقی وزیر خزانہ و محصولات سینیٹر محمد اورنگزیب کی زیر صدارت وزارت خزانہ میں منعقدہ کمیٹی کے اجلاس میں کیے گئے۔ اجلاس میں وفاقی وزیر سائنس و ٹیکنالوجی خالد حسین مگسی، متعلقہ وفاقی سیکریٹریز اور مختلف وزارتوں، ڈویژنز اور ریگولیٹری اداروں کے سینئر حکام نے بھی شرکت کی۔ وزارت خزانہ کے مطابق کمیٹی نے غور و خوض کے بعد دونوں تجاویز کی منظوری دی۔ وزیر خزانہ نے زور دیا کہ سرکاری اداروں کے بورڈز میں بطور ایکس آفیشیو ڈائریکٹرز خدمات انجام دینے والے حکومتی نمائندے متعلقہ عہدوں کے لیے موزوں، اہل اور تجربہ کار ہونے چاہئیں تاکہ وہ اپنے اداروں اور ڈویژنز کی مؤثر نمائندگی کرسکیں۔ یہ فیصلے سرکاری اداروں میں بہتر انتظامی نگرانی، کارپوریٹ گورننس کے فروغ اور آپریشنل کارکردگی میں بہتری کے لیے حکومت کی وسیع تر اصلاحاتی کوششوں کا حصہ ہیں، خصوصاً بجلی کی تقسیم کار کمپنیوں میں۔ حکومت مالی نقصانات، ناقص انتظامی امور اور سیاسی مداخلت سے متعلق خدشات کے پیش نظر ان کمپنیوں کے بورڈز میں اصلاحات پر کام کر رہی ہے۔ جون 2024 میں حکومت نے خسارے میں چلنے والی بجلی کی تقسیم کار کمپنیوں کے بورڈز تبدیل کرنے کے اقدامات شروع کیے تھے، جبکہ سرکاری اداروں کے انتظام و انصرام سے متعلق ترمیمی بل 2024 جولائی میں سینیٹ سے منظور ہوا تھا۔ قانون سازی کا مقصد آزاد ڈائریکٹرز کی تقرری کے لیے باضابطہ طریقہ کار متعارف کروا کر سرکاری اداروں کے بورڈز کی خودمختاری اور کارکردگی بہتر بنانا تھا۔