ساہیوال 14 اپریل 2026 (کامران راجہ): چیئرمین سینیٹ سید یوسف رضا گیلانی نے وفاقی وزیر برائے تخفیفِ غربت و سماجی تحفظ سید عمران احمد شاہ کی رہائش گاہ پر ان کی والدہ کے انتقال پر گہرے دکھ اور افسوس کا اظہار کیا۔ چیئرمین سینیٹ نے سوگوار خاندان سے دلی ہمدردی کا اظہار کرتے ہوئے دعا کی کہ اللہ تعالیٰ مرحومہ کو جنت الفردوس میں اعلیٰ مقام عطا فرمائے اور پسماندگان کو یہ صدمہ برداشت کرنے کے لیے صبرِ جمیل عطا کرے۔ اس موقع پر رکن صوبائی اسمبلی ملک محمد ارشد اور پاکستان پیپلز پارٹی کے زکی چوہدری بھی موجود تھے۔
میڈیا کے نمائندگان سے گفتگو کرتے ہوئے چیئرمین سینیٹ سید یوسف رضا گیلانی نے کہا کہ پاکستان ایک ذمہ دار ایٹمی ریاست کے طور پر ہمیشہ تحمل، بردباری اور دانشمندی کا مظاہرہ کرتا آیا ہے اور ہر قسم کی جارحیت کے باوجود بین الاقوامی قوانین کے مطابق صرف دفاعی اقدامات تک خود کو محدود رکھا ہے۔ انہوں نے کہا کہ پاکستان نے خود کو ایک ذمہ دار ریاست کے طور پر پیش کرنے کے لیے زیادہ سے زیادہ صبر و ضبط کا مظاہرہ کیا اور اشتعال انگیزیوں اور بین الاقوامی اصولوں کی خلاف ورزیوں کے باوجود کسی قسم کے غیر ضروری ردعمل سے گریز کیا۔ انہوں نے صدر ، وزیراعظم ، سفارتی اداروں، خصوصاً دفترِ خارجہ اور دیگر متعلقہ حلقوں کے ساتھ ساتھ عسکری قیادت کو خراجِ تحسین پیش کیا جنہوں نے پیچیدہ علاقائی حالات کو دانشمندی، تحمل اور ذمہ داری کے ساتھ سنبھالا۔
انہوں نے مزید کہا کہ پاکستان نے بدلتی ہوئی علاقائی صورتحال میں مکمل غیر جانبداری کی پالیسی اختیار کی ہے جس سے عالمی برادری میں ملک پر اعتماد میں اضافہ ہوا ہے اور پاکستان کو بات چیت اور کشیدگی میں کمی کے لیے مثبت کردار ادا کرنے کا موقع ملا ہے۔ انہوں نے کہا کہ عالمی طاقتیں، بشمول امریکہ، اور دیگر عالمی رہنما پاکستان کی مخلصانہ اور متوازن کوششوں کو سراہ چکے ہیں۔ انہوں نے واضح کیا کہ موجودہ چیلنجز کسی ایک ملک تک محدود نہیں بلکہ دیگر خطوں تک پھیلے ہوئے ہیں، اور ایسے مسائل ایک ہی ملاقات میں حل نہیں ہو سکتے بلکہ اس کے لیے مسلسل سفارتی کاوشیں، مکالمہ اور بین الاقوامی تعاون ناگزیر ہیں تاکہ جنگ بندی برقرار رکھی جا سکے اور کشیدگی میں مزید اضافہ نہ ہو۔
چیئرمین سینیٹ نے دوست ممالک خصوصاً چائنہ کے مثبت کردار کو بھی سراہا جنہوں نے امن کے قیام اور جنگ بندی کی کوششوں میں معاونت فراہم کی۔ انہوں نے اس عزم کا اعادہ کیا کہ پاکستان علاقائی اور عالمی سطح پر امن، غیر جانبداری اور تعمیری روابط کے فروغ کے لیے اپنی کوششیں جاری رکھے گا۔ انہوں نے مسلم دنیا کے اتحاد کی اہمیت پر زور دیتے ہوئے کہا کہ موجودہ حالات میں یہ اتحاد پہلے سے کہیں زیادہ ضروری ہو چکا ہے، اور Organisation of Islamic Cooperation جیسے فورم اپنا کردار ادا کر رہے ہیں جبکہ عالمی برادری بھی پاکستان کی مثبت کوششوں کو تسلیم کر رہی ہے۔
داخلی امور پر گفتگو کرتے ہوئے انہوں نے کہا کہ بجلی کی بندش جیسے مسائل ایک عرصے سے موجود ہیں جنہیں جاری پارلیمانی اجلاس کے اختتام کے بعد آئندہ اجلاسوں میں زیرِ غور لایا جائے گا۔ انہوں نے اس بات کا اعادہ کیا کہ پاکستان پیپلز پارٹی حکومت کے ساتھ ایک تعمیری شراکت دار کے طور پر کھڑی ہے، مثبت پالیسیوں کی حمایت کرتی ہے اور جہاں ضروری ہو وہاں بہتری کے لیے تجاویز بھی پیش کرتی ہے۔ انہوں نے کہا کہ اگرچہ جماعت حکومت کا باقاعدہ حصہ نہیں ہے، تاہم قومی مفاد میں قانون سازی اور پالیسی سازی میں ذمہ دارانہ کردار ادا کرتی رہے گی۔
چیئرمین سینیٹ نے پاکستان کے امن، استحکام اور ذمہ دار عالمی کردار کے عزم کو دہراتے ہوئے کہا کہ ملک بات چیت کے فروغ، تنازعات کی روک تھام اور عالمی برادری میں ایک متوازن اور قابلِ اعتماد ریاست کے طور پر اپنا کردار مضبوط بنانے کے لیے اپنی کوششیں جاری رکھے گا۔