واشنگٹن، 17 اگست، 2026 (نیوز ڈیسک) — امریکی صدر ڈونلڈ ٹرمپ نے اعلان کیا ہے کہ امریکا اپنے اہم علاقائی اتحادی جنوبی کوریا کے ساتھ ہونے والی فوجی مشقوں میں کمی کرے گا۔ ٹرمپ نے اس فیصلے کی وجہ شمالی کوریا کے رہنما کم جونگ اُن کے ساتھ اپنے مثبت تعلقات اور ایران کے معاملے پر واشنگٹن کی مدد کرنے سے جنوبی کوریا کے انکار کو قرار دیا۔ ٹرمپ نے کہا کہ وہ اس بات سے خوش نہیں ہیں کہ امریکا نے ماضی میں جنوبی کوریا کے ساتھ مشترکہ فوجی مشقوں میں شرکت پر اتفاق کیا تھا۔ ان کے مطابق یہ مشقیں مہنگی ہیں اور شمالی کوریا کو ایک ایسا پیغام دے سکتی ہیں جسے وہ نامناسب اور جارحانہ سمجھتا ہے۔ ٹرمپ نے اپنے سوشل میڈیا پلیٹ فارم ٹروتھ سوشل پر کہا کہ انہوں نے حال ہی میں جنوبی کوریا کے صدر لی جے میونگ سے پوچھا تھا کہ آیا جنوبی کوریا ایران کو جوہری ہتھیاروں سے پاک کرنے کی امریکی کوشش میں شامل ہونا چاہتا ہے، تاہم جنوبی کوریا نے انکار کر دیا۔ڈونلڈ ٹرمپ کے شمالی کوریا کے رہنما کم جونگ اُن کے ساتھ نسبتاً گرم تعلقات رہے ہیں، حالانکہ شمالی کوریا طویل عرصے سے امریکا کا حریف ہے۔ ٹرمپ نے رواں ہفتے کے آخر میں کم جونگ اُن کے ساتھ اپنی ایک تصویر بھی شیئر کی اور کہا کہ دونوں رہنماؤں کے درمیان بہت اچھے تعلقات ہیں۔ جنوبی کوریا کے ساتھ امریکا کی مشترکہ فوجی مشقیں ’’الچی فریڈم شیلڈ‘‘ 17 اگست سے شروع ہونے والی تھیں اور 10 روز تک جاری رہنے کا پروگرام تھا۔شمالی کوریا طویل عرصے سے امریکا اور جنوبی کوریا کی مشترکہ فوجی مشقوں پر تنقید کرتا آیا ہے اور انہیں جارحیت کی تیاری قرار دیتا ہے۔امریکی صدر کا یہ اعلان ایسے وقت میں سامنے آیا ہے جب خطے میں سکیورٹی خدشات میں اضافہ اور ایران کے جوہری پروگرام سے متعلق امریکی کوششیں جاری ہیں۔