لندن، 8 ستمبر 2026 (نوشین): برطانیہ کے بڑے ہوائی اڈوں سے روانہ ہونے والی متعدد پروازیں منگل کے روز متاثر ہوئیں جب فضائی ٹریفک کنٹرول فراہم کرنے والے ادارے نیشنل ایئر ٹریفک سروسز کو تکنیکی خرابی کا سامنا کرنا پڑا، جس کے باعث ہیتھرو، گیٹ وک، مانچسٹر اور اسٹینسٹیڈ سمیت متعدد ہوائی اڈوں پر پروازوں کو پابندیوں اور تاخیر کا سامنا کرنا پڑا۔ نیشنل ایئر ٹریفک سروسز نے ایک بیان میں کہا کہ اس نے مسئلے کی نشاندہی اپنے فلائٹ پروسیسنگ سسٹم میں کی ہے، جبکہ انجینئرز موقع پر موجود ہیں اور معمول کی فضائی کارروائیاں جلد از جلد بحال کرنے کے لیے ہنگامی بنیادوں پر کام کر رہے ہیں۔ فضائی ٹریفک کنٹرول ادارے نے کہا کہ پروازوں کی روانگی جاری ہے اور برطانوی فضائی حدود کھلی ہیں، تاہم معمول کی صورتحال بحال ہونے میں کچھ وقت لگے گا۔ برطانیہ کے سب سے بڑے فضائی مرکز ہیتھرو ایئرپورٹ نے کہا کہ وہ مسئلے کو جلد حل کرنے کے لیے نیشنل ایئر ٹریفک سروسز کے ساتھ مل کر کام کر رہا ہے۔ ایڈنبرا ایئرپورٹ نے سوشل میڈیا پلیٹ فارم ایکس پر جاری بیان میں کہا کہ تکنیکی خرابی کے باعث اس کی فضائی کارروائیاں بھی متاثر ہو سکتی ہیں، جبکہ آئرلینڈ کے ڈبلن ایئرپورٹ نے بھی بتایا کہ وہاں سے روانہ ہونے اور وہاں پہنچنے والی پروازیں متاثر ہو رہی ہیں۔ پروازوں کی نگرانی کرنے والی ویب سائٹ فلائٹ ریڈار 24 نے سوشل میڈیا پر کہا کہ اس تکنیکی مسئلے کے باعث لندن فلائٹ انفارمیشن ریجن کے ہوائی اڈوں پر آمد و روانگی کی پروازوں کو سخت ضابطوں اور پابندیوں کے تحت چلایا جا رہا ہے۔ یہ برطانیہ کے فضائی ٹریفک کنٹرول نظام کو درپیش حالیہ مسائل میں سے ایک ہے۔ 2024 میں برطانیہ کے ہوا بازی کے نگران ادارے نے نیشنل ایئر ٹریفک سروسز کو ہدایت کی تھی کہ وہ سسٹم میں خرابی کی صورت میں متبادل انتظامات کے منصوبوں کا جائزہ لے، کیونکہ ایک سال قبل فلائٹ پلانز کی خودکار پروسیسنگ میں خرابی کے باعث برطانیہ کے مختلف ہوائی اڈوں پر شدید افراتفری پیدا ہوئی تھی۔ ایئرلائنز کے سربراہان نے بتایا تھا کہ اس واقعے کے نتیجے میں انہیں ریفنڈز اور معاوضوں کی مد میں 100 ملین پاؤنڈ سے زیادہ کا نقصان اٹھانا پڑا۔ گزشتہ سال جولائی میں بھی برطانیہ کے فضائی ٹریفک کنٹرول نظام میں ریڈار سے متعلق تکنیکی خرابی کے باعث لندن اور دیگر علاقوں کے بڑے ہوائی اڈوں، بشمول ہیتھرو، پر چار گھنٹے سے زائد عرصے تک پروازیں متاثر ہوئی تھیں۔