اسلام آباد، 10 نومبر 2026 (نوشین): خلیج تعاون کونسل (جی سی سی) کے رکن ممالک نے کویت میں اپنی مشترکہ فوجی کمانڈ کا جدید ہیڈکوارٹر قائم کرنے اور وہاں مناسب تعداد میں فوجی دستے تعینات کرنے کی منظوری دے دی ہے۔ سعودی سرکاری ٹی وی الاخباریہ کے مطابق یہ اعلان بحرین میں جی سی سی کی مشترکہ دفاعی کونسل کے 23ویں اجلاس کے بعد کیا گیا، جس میں رکن ممالک کے وزرائے دفاع نے شرکت کی۔ مجوزہ ہیڈکوارٹر اور تعینات کیے جانے والے فوجیوں کی تعداد سے متعلق مزید تفصیلات فوری طور پر سامنے نہیں آئیں۔ جی سی سی نے دسمبر 2013 میں کویت میں مشترکہ فوجی کمانڈ قائم کی تھی، جس کا مقصد مشترکہ فوجی کارروائیوں کی منصوبہ بندی اور نگرانی کے ساتھ رکن ممالک کی سرزمین، فضائی حدود، سمندری حدود اور مفادات کو ممکنہ خطرات سے محفوظ بنانے کے لیے دفاعی صلاحیتوں کو مضبوط کرنا ہے۔ یہ پیش رفت ایسے وقت میں سامنے آئی ہے جب 28 فروری کو امریکا اور اسرائیل کی جانب سے ایران کے خلاف جنگ شروع کیے جانے کے بعد خلیجی عرب ممالک کو ایرانی میزائلوں اور ڈرون حملوں کا سامنا کرنا پڑا ہے۔ جنگ کے باعث فضائی سفر اور بحری تجارت متاثر ہوئی ہے، جبکہ خطے سے تیل اور گیس کی اہم برآمدات کی سلامتی سے متعلق خدشات بھی بڑھ گئے ہیں۔ دوسری جانب ایرانی وزیر خارجہ عباس عراقچی نے کہا ہے کہ ایران کے خلاف جنگ کا خاتمہ فوجی کارروائی یا مزید پابندیوں سے نہیں بلکہ احترام، سفارت کاری اور تہران کے مطالبات تسلیم کرنے سے ممکن ہے۔ ایرانی خبر رساں ادارے ارنا کے مطابق عراقچی نے منگل کو ایران کے اعلیٰ سکیورٹی عہدیدار اور امریکی نائب صدر کے درمیان ممکنہ ملاقات سے متعلق میڈیا رپورٹس کو بے بنیاد قرار دیا۔ انہوں نے کہا کہ تنازع کے خاتمے کے لیے سفارت کاری اور ایران کی شرائط پوری کرنا ہی واحد قابل عمل راستہ ہے اور اس سلسلے میں دو روزہ تجویز اب بھی زیر غور ہے۔