اسلام آباد، 02 نومبر 2026 (کامران راجہ): امریکا کی پانچ ریاستوں میں ہفتے کے اختتام پر جامعات کے قریب فائرنگ کے مختلف واقعات میں کم از کم تین افراد ہلاک اور 29 دیگر زخمی ہو گئے، جس کے بعد پولیس نے متعدد تحقیقات شروع کر دیں۔ فاکس نیوز کے مطابق انڈیانا کے شہر بلومنگٹن میں انڈیانا یونیورسٹی کی ہوم کمنگ تقریبات کے قریب اتوار کی صبح تقریباً ڈیڑھ بجے فائرنگ کے نتیجے میں سات افراد کو اسپتال منتقل کیا گیا۔ پولیس نے اسلحہ رکھنے والے ایک شخص کو حراست میں لے کر ایک بندوق اور گولیوں کے خول برآمد کیے، تاہم تفتیش کار تاحال یہ معلوم نہیں کر سکے کہ آیا اس شخص نے فائرنگ کی تھی یا نہیں۔ ریاست ڈیلاویئر کے شہر نیوارک میں یونیورسٹی آف ڈیلاویئر کے قریب مین اسٹریٹ پر ہفتے کی شب فائرنگ سے کم از کم چھ افراد اسپتال پہنچائے گئے۔ یونیورسٹی کی صدر لورا کارلسن نے متاثرین اور عینی شاہدین سے یکجہتی کا اظہار کرتے ہوئے کہا کہ اس واقعے سے پوری کمیونٹی متاثر ہوئی ہے۔ ریاست الاباما کے شہر برمنگھم میں الاباما اے اینڈ ایم اور الاباما اسٹیٹ کے درمیان میجک سٹی کلاسک فٹبال میچ کے بعد لیجن فیلڈ کے قریب فائرنگ سے ایک شخص ہلاک اور آٹھ زخمی ہو گئے۔ میچ دیکھنے کے لیے تقریباً 70 ہزار افراد موجود تھے، جبکہ پولیس نے پوچھ گچھ کے لیے ایک شخص کو حراست میں لے کر متعدد ہتھیار بھی برآمد کیے۔ ریاست الینوائے کے شہر بلومنگٹن میں الینوائے ویسلیئن یونیورسٹی کے قریب فائرنگ سے 19 سالہ خاتون ہلاک اور سات دیگر افراد اسپتال منتقل کیے گئے، جبکہ زخمی خواتین میں سے ایک کی حالت تشویشناک بتائی گئی ہے۔ واقعے کی تحقیقات میں بیورو آف الکوحل، ٹوبیکو، فائرآرمز اینڈ ایکسپلوسوز بھی شامل ہو گیا ہے۔ ریاست کولوراڈو کے شہر بولڈر کے یونیورسٹی ہِل علاقے میں ایک گھر پر فائرنگ کے نتیجے میں یونیورسٹی آف کولوراڈو بولڈر کا 19 سالہ طالب علم ہلاک اور ایک دوسرا شخص شدید زخمی ہو گیا۔ پولیس کے مطابق واقعہ گھر میں زبردستی داخل ہونے کی کوشش کے بعد پیش آیا، جہاں اس سے قبل اہلکاروں نے ایک بڑی تقریب کو منتشر کیا تھا۔