اسلام آباد، 11 اکتوبر 2026 (غفران): وزیراعظم محمد شہباز شریف نے ضلع کرم میں پاکستان اور افغانستان کی سرحد پر دہشت گردوں کی دراندازی کی کوشش ناکام بنانے اور 12 خوارج اور افغان طالبان اہلکاروں کو ہلاک کرنے پر سکیورٹی فورسز کی کارکردگی کو سراہا ہے۔ فائرنگ کے تبادلے میں نائب صوبیدار ہدایت امان کی شہادت پر گہرے دکھ اور افسوس کا اظہار کرتے ہوئے وزیراعظم نے وطن کے دفاع میں اپنی جان قربان کرنے والے بہادر سپاہی کو خراجِ عقیدت پیش کیا۔ وزیراعظم نے کہا کہ نائب صوبیدار ہدایت امان نے ملکی سرحدوں کی حفاظت کرتے ہوئے غیر معمولی بہادری، شجاعت اور پیشہ ورانہ لگن کی روشن مثال قائم کی۔ وزیراعظم آفس کے میڈیا ونگ کی جانب سے جاری کردہ بیان کے مطابق، شہباز شریف نے شہید کے اہلِ خانہ سے دلی تعزیت اور ہمدردی کا اظہار کیا اور شہید کے درجات کی بلندی اور جنت الفردوس میں اعلیٰ مقام کے لیے دعا کی۔ وزیراعظم نے ریاست کے غیر متزلزل عزم کا اعادہ کرتے ہوئے کہا کہ پاکستان اپنی سرحدوں کے دفاع اور دہشت گردی کی لعنت کے مکمل خاتمے کی بھرپور صلاحیت رکھتا ہے۔ انہوں نے واضح کیا کہ پاکستان کی قومی سلامتی اور خودمختاری پر کسی قسم کا سمجھوتہ نہیں کیا جائے گا۔ وزیراعظم نے مزید کہا کہ دہشت گردی کے خلاف جاری جنگ میں پوری قوم اپنی بہادر سکیورٹی فورسز کے شانہ بشانہ کھڑی ہے۔