کیف، 7 اکتوبر 2026 (نوشین): روس نے بدھ کے روز یوکرین پر ڈرونز اور میزائلوں کی بڑے پیمانے پر کارروائی کی، جس کے نتیجے میں کم از کم 8 افراد ہلاک جبکہ رہائشی عمارتوں، صنعتی تنصیبات اور اہم بنیادی ڈھانچے کو نقصان پہنچا۔ یوکرینی حکام کے مطابق دارالحکومت کیف میں 2، شمالی شہر پریلوکی میں 4 جبکہ وسطی پولتاوا کے علاقے میں 2 افراد ہلاک ہوئے۔ یوکرینی فضائیہ کے مطابق روس نے رات کے دوران 130 ڈرونز، 48 کروز میزائل اور بیلسٹک میزائلوں سے حملے کیے، جبکہ فضائی دفاعی نظام نے 161 اہداف کو روکنے یا تباہ کرنے کا دعویٰ کیا۔ وسطی یوکرین کے کیف اور پولتاوا، جنوب مشرقی علاقے دنیپروپیٹرووسک اور شمال مشرقی علاقے خارکیف حملوں کا اہم ہدف رہے۔ یوکرین کے انسانی حقوق کے پارلیمانی کمشنر دمترو لوبینیتس نے حملوں کو دہشت کی ایک اور رات قرار دیتے ہوئے کہا کہ شہریوں کو حملوں کے باوجود اپنی روزمرہ زندگی جاری رکھنا پڑ رہی ہے۔ روسی وزارت دفاع نے کہا کہ روسی فورسز نے کیف اور یوکرین کے دیگر علاقوں میں فوجی صنعتی تنصیبات کے خلاف بڑے پیمانے پر کارروائی کی، جس میں زمین، سمندر اور فضا سے داغے جانے والے انتہائی درستگی والے ہتھیاروں اور ڈرونز کا استعمال کیا گیا۔ روسی وزارت دفاع کے مطابق حملوں میں یوکرینی دفاعی کمپنی فائر پوائنٹ سے منسلک تنصیبات کو بھی نشانہ بنایا گیا، جہاں مبینہ طور پر فلامنگو کروز میزائل اور درمیانے و طویل فاصلے تک مار کرنے والے ڈرون تیار اور ذخیرہ کیے جاتے ہیں۔ شمالی علاقے چرنی ہیو میں روسی میزائل پانچ منزلہ رہائشی عمارت سے ٹکرا گیا، جس کے نتیجے میں کم از کم 4 افراد ہلاک اور تقریباً 20 زخمی ہوگئے۔ مقامی حکام کے مطابق امدادی کارکنوں نے ملبے سے زندہ بچ جانے والوں کی تلاش جاری رکھی جبکہ مزید افراد کے ملبے تلے دبے ہونے کا خدشہ ہے۔ کیف میں شہریوں نے فضائی حملوں کے انتباہ کے بعد زیر زمین میٹرو اسٹیشنوں میں پناہ لی، جبکہ دارالحکومت میں رات بھر دھماکوں کی آوازیں سنی گئیں۔ یوکرینی حکام کے مطابق کیف کو بیلسٹک میزائلوں سے بھی نشانہ بنایا گیا۔ یوکرین نے فضائی دفاعی نظام کی شدید کمی کے باعث متعدد بار مزید دفاعی نظام فراہم کرنے کی اپیل کی ہے۔ علاقائی حکام کے مطابق رات کے حملوں میں دنیپرو میں ایک صنعتی تنصیب، زاپوریژیا میں نقل و حمل کے بنیادی ڈھانچے اور کریمنچوک میں رہائشی عمارتوں کو بھی نقصان پہنچا۔