کائنات امتیاز کا بین الاقوامی کرکٹ سے ریٹائرمنٹ کا اعلان

کراچی، 4 اکتوبر 2026 (غفران): پاکستان ویمنز ٹیم کی فاسٹ باؤلر کائنات امتیاز نے 13 سالہ بین الاقوامی کرکٹ کیریئر کے بعد بین الاقوامی کرکٹ سے ریٹائرمنٹ کا اعلان کر دیا ہے۔ کائنات امتیاز نے پاکستان کی نمائندگی کرتے ہوئے 19 ایک روزہ بین الاقوامی اور 21 ٹی ٹوئنٹی بین الاقوامی میچز کھیلے۔ کائنات نے حال ہی میں کرکٹ میں ایک نئے سفر کا آغاز کرتے ہوئے اگست اور ستمبر میں ہونے والے پی سی بی نیشنل ویمنز انڈر 19 ٹی ٹوئنٹی ٹورنامنٹ میں میچ ریفری کی ذمہ داریاں بھی انجام دیں۔ انہوں نے 2017 کے آئی سی سی ویمنز کرکٹ ورلڈ کپ میں پاکستان کی نمائندگی کی اور چار میچز کھیلے۔ کائنات نے اکتوبر 2010 میں جنوبی افریقہ کے خلاف پوچیسف روم میں ٹی ٹوئنٹی بین الاقوامی کرکٹ میں ڈیبیو کیا، جبکہ بنگلہ دیش کے شہر فتح اللہ میں آئرلینڈ کے خلاف ون ڈے ڈیبیو کیا۔ دائیں ہاتھ کی فاسٹ باؤلر کائنات امتیاز پاکستان کی ان ویمنز اسکواڈز کا بھی حصہ رہیں جنہوں نے 2010 اور 2014 میں چین اور جنوبی کوریا میں ہونے والے ایشین گیمز میں سونے کے تمغے جیتے، جبکہ وہ 2022 کے کامن ویلتھ گیمز میں بھی پاکستان کی نمائندگی کرنے والے اسکواڈ کا حصہ تھیں۔ کائنات نے اپنا آخری ون ڈے جنوری 2023 میں آسٹریلیا کے خلاف گابا میں کھیلا، جبکہ آخری ٹی ٹوئنٹی بین الاقوامی میچ اکتوبر 2022 میں سلہٹ میں تھائی لینڈ کے خلاف کھیلا۔ کائنات امتیاز نے فروری 2007 میں پی سی بی نیشنل اسکولز انڈر 17 ویمنز چیمپئن شپ میں کراچی اسکولز انڈر 17 ٹیم سے کرکٹ کیریئر کا آغاز کیا، اس کے بعد مارچ 2008 میں ڈومیسٹک لسٹ اے کرکٹ اور اسی سال ٹی ٹوئنٹی کرکٹ میں ڈیبیو کیا۔ کائنات امتیاز کے خاندان کا بھی کرکٹ میں نمایاں مقام ہے، ان کی والدہ سلیمٰہ امتیاز 2024 میں آئی سی سی انٹرنیشنل ڈویلپمنٹ پینل پر پاکستان کی پہلی خاتون امپائر بنیں اور اب تک 9 ویمنز ون ڈے اور 69 ویمنز ٹی ٹوئنٹی بین الاقوامی میچز میں امپائرنگ کر چکی ہیں۔