لندن، 3 اکتوبر 2026 (نوشین): برطانوی حکام نے یوم کپور کے موقع پر مانچسٹر کی یہودی برادری کو مبینہ طور پر نشانہ بنانے کی سازش کے الزام میں دو ایرانی شہریوں پر دہشت گردی سے متعلق الزامات عائد کر دیے۔ یوم کپور یہودی مذہب کا مقدس ترین دن تصور کیا جاتا ہے۔ 35 سالہ رحمان صالحی اور 36 سالہ سلام احمدیان پر دہشت گردی کی کارروائی کی تیاری یا کسی دوسرے شخص کو دہشت گردی کی کارروائی میں معاونت فراہم کرنے کے الزامات عائد کیے گئے ہیں۔ انسداد دہشت گردی پولیس کے مطابق دونوں افراد نے مبینہ طور پر دیسی ساختہ دھماکا خیز مواد تیار کرنے کے لیے پرزے اور آلات حاصل کرنے کی کوشش کی اور ممکنہ اہداف کی نگرانی بھی کی۔ پولیس نے مزید کہا کہ دونوں ملزمان مبینہ طور پر بیرون ملک موجود ایک تیسرے فریق سے رابطے میں تھے، جس کے ایران میں ہونے کا امکان ہے۔ برطانوی وزیر داخلہ شبانہ محمود نے کہا کہ مبینہ سازش برطانیہ میں ایرانی سرگرمیوں سے متعلق وسیع تر سکیورٹی خدشات کی عکاسی کرتی ہے اور یہودی برادریاں ممکنہ اہداف میں شامل رہی ہیں۔ ایران نے ایسی سرگرمیوں میں ملوث ہونے کے الزامات کی تردید کی ہے۔ دونوں ملزمان کئی سال قبل یورپ سے چھوٹی کشتی کے ذریعے برطانیہ پہنچے تھے اور انہیں لندن کی ویسٹ منسٹر مجسٹریٹس کورٹ میں پیش کیا جائے گا۔ برطانوی وزارت داخلہ کے مطابق ایک ملزم کو پہلے ہی پناہ دی جا چکی تھی جبکہ دوسرے کی پناہ کی درخواست زیرِ غور ہے۔ انسداد دہشت گردی پولیس نے کہا کہ مقدس ایام کے دوران مبینہ سازش کی خبر سے یہودی برادری اور عام عوام میں تشویش پیدا ہوئی ہے۔ پولیس کے مطابق مانچسٹر کے کیس کا برطانیہ میں امریکی استعمال کے لیے موجود آر اے ایف فیئر فورڈ ایئربیس سے متعلق ایک الگ مبینہ سازش سے کوئی تعلق نہیں، جس میں ایک برطانوی ایرانی شہری کو گرفتار کیا گیا ہے۔ برطانوی حکام نے اس معاملے میں ایرانی مداخلت کے شبے کی تحقیقات جاری رکھنے کا کہا ہے، جبکہ ایران نے اس میں بھی کسی قسم کے ملوث ہونے کی تردید کی ہے۔