لندن، 29 ستمبر 2026 (کامران راجہ): شطرنج کی 11 سالہ برطانوی کھلاڑی بودھنا سیوانندن سمرقند، ازبکستان میں ہونے والی 46ویں شطرنج اولمپیاڈ میں شاندار کارکردگی کے بعد تاریخ کی کم عمر ترین ویمن گرینڈ ماسٹر بن گئیں۔ شمال مغربی لندن سے تعلق رکھنے والی بودھنا سیوانندن نے انگلینڈ کی نمائندگی کرتے ہوئے یہ اعزاز حاصل کیا اور انٹرنیشنل چیس فیڈریشن کو بتایا کہ وہ شطرنج کی تاریخ میں مزید ریکارڈ قائم کرنے کے لیے پرعزم ہیں۔ ویمن گرینڈ ماسٹر کا اعزاز شطرنج میں خواتین کے لیے مخصوص اعلیٰ ترین ٹائٹلز میں شامل ہے۔ بودھنا نے کہا کہ وہ اس کامیابی پر خوش ہیں، تاہم وہ یہاں رکنے کے بجائے اپنی پیش رفت جاری رکھنا اور مزید تاریخ رقم کرنا چاہتی ہیں۔ انہوں نے اولمپیاڈ میں ٹاپ بورڈ پر کھیلنے کے دباؤ کے حوالے سے کہا کہ انہیں خاص دباؤ محسوس نہیں ہوا اور انہوں نے صرف کھیل سے لطف اندوز ہونے کی کوشش کی۔ بودھنا اس سے قبل برطانیہ کی کم عمر ترین خاتون شطرنج چیمپئن بن چکی ہیں اور کسی بھی کھیل میں بین الاقوامی سطح پر انگلینڈ کی نمائندگی کرنے والی کم عمر ترین شخصیت بھی قرار پائی تھیں۔ اگست 2025 میں انہوں نے صرف 10 سال، 5 ماہ اور 3 دن کی عمر میں 60 سالہ گرینڈ ماسٹر پیٹ ویلز کو شکست دے کر کسی گرینڈ ماسٹر کو ہرانے والی کم عمر ترین خاتون کھلاڑی کا ریکارڈ بھی قائم کیا تھا، جس سے اس سے قبل امریکی کھلاڑی کیریسا یِپ کے پاس موجود ریکارڈ ٹوٹ گیا تھا۔ بودھنا نے کووڈ-19 وبا کے دوران 5 سال کی عمر میں شطرنج کھیلنا شروع کی، جب انہیں اپنے والد کے ایک دوست کی جانب سے دیے گئے کھلونوں اور کتابوں میں ایک شطرنج کی بساط ملی۔ انہوں نے بتایا کہ انہیں شطرنج کے مہرے دلچسپ لگے اور ابتدا میں وہ انہیں کھلونوں کے طور پر استعمال کرنا چاہتی تھیں، تاہم ان کے والد نے انہیں شطرنج کا کھیل سکھانا شروع کیا۔ بودھنا کا کہنا ہے کہ انہیں شطرنج کے ساتھ مقابلوں کے لیے سفر کرنا بھی پسند ہے اور یہ کھیل ان کی تعلیمی سرگرمیوں میں بھی مددگار ثابت ہوتا ہے۔