ٹانک، 28 ستمبر 2026 (کامران راجہ): خیبر پختونخوا کے ضلع ٹانک میں دہشت گردوں نے پولیس کی گاڑی پر فائرنگ کردی، جس کے نتیجے میں تین ٹریفک پولیس اہلکار شہید ہوگئے۔ واقعے کے بعد شہید اہلکاروں کی لاشیں ڈسٹرکٹ ہیڈکوارٹرز اسپتال منتقل کردی گئیں۔ مسلح حملہ آور فائرنگ کے بعد موقع سے فرار ہوگئے، جبکہ پولیس نے ملزمان کی تلاش کے لیے علاقے میں سرچ آپریشن شروع کردیا۔ وفاقی وزیر داخلہ محسن نقوی نے حملے کی شدید مذمت کرتے ہوئے تینوں پولیس اہلکاروں کی شہادت پر گہرے دکھ اور افسوس کا اظہار کیا۔ انہوں نے شہید اہلکاروں کو خراج عقیدت پیش کرتے ہوئے ان کے اہل خانہ سے تعزیت کی اور کہا کہ حکومت غم کی اس گھڑی میں متاثرہ خاندانوں کے ساتھ کھڑی ہے۔ محسن نقوی نے کہا کہ دہشت گردی کے خلاف جنگ میں جانوں کا نذرانہ پیش کرنے والوں کی قربانیاں رائیگاں نہیں جائیں گی۔ یہ واقعہ خیبر پختونخوا میں حالیہ دہشت گرد حملوں کے سلسلے کی ایک کڑی ہے۔ ایک روز قبل لکی مروت میں حملے کے دوران تین افراد جاں بحق اور تین زخمی ہوئے تھے۔ اس سے قبل ڈیرہ اسماعیل خان میں ایک چیک پوسٹ پر مبینہ خودکش دھماکے اور فائرنگ کے واقعے میں 12 افراد جاں بحق اور 35 زخمی ہوئے تھے۔ 18 ستمبر کو کوہاٹ کی پرانی پولیس لائنز میں نماز جمعہ کے دوران حملے میں 21 افراد جاں بحق جبکہ 100 سے زائد زخمی ہوئے تھے۔