آسٹریلیا کے خلاف ون ڈے سیریز سے قبل جنوبی افریقہ کو بڑا دھچکا

جوہانسبرگ، 18 ستمبر 2026 (نوشین): آسٹریلیا کے خلاف تین میچوں کی ون ڈے سیریز سے قبل جنوبی افریقہ کو ایک اور دھچکا لگا ہے، فاسٹ باؤلر لنگی نگیڈی ہیمسٹرنگ انجری کے باعث سیریز سے باہر ہوگئے ہیں۔ 30 سالہ نگیڈی کو گزشتہ ہفتے ڈومیسٹک فرسٹ کلاس سیزن کے افتتاحی میچ میں ٹائٹنز کی جانب سے ڈولفنز کے خلاف کھیلتے ہوئے دائیں ہیمسٹرنگ میں انجری ہوئی تھی۔ بدھ کو ہونے والے اسکین میں انجری کی شدت کی تصدیق ہوگئی، جس کے بعد فاسٹ باؤلر بحالی کے عمل سے گزریں گے۔ نگیڈی کے علاوہ کاگیسو ربادا اور اوٹنیل بارٹمین بھی ون ڈے سیریز سے باہر ہیں، جس کے بعد نگیڈی تیسرے جنوبی افریقی فاسٹ باؤلر ہیں جو سیریز میں شرکت نہیں کر سکیں گے۔ جنوبی افریقہ نے نگیڈی کی جگہ 20 سالہ نکوابانی موکوئینا کو اسکواڈ میں شامل کیا ہے، جنہوں نے حالیہ دورۂ نمیبیا کے دوران اپنا ون ڈے ڈیبیو کیا تھا۔ موکوئینا کو ویسٹرن پروونس کے خلاف ڈولفنز کے فرسٹ کلاس میچ سے واپس بلا لیا گیا، جہاں انہوں نے 19 اوورز میں 78 رنز دے کر ایک وکٹ حاصل کی۔ نگیڈی کی انجری سے 9 اکتوبر سے شروع ہونے والی آسٹریلیا کے خلاف تین ٹیسٹ میچوں کی سیریز میں ان کی شرکت بھی متاثر ہوسکتی ہے، تاہم اس حوالے سے فیصلہ ان کی بحالی اور صحت کا جائزہ لینے کے بعد کیا جائے گا۔ جنوبی افریقہ کے نظرثانی شدہ ون ڈے اسکواڈ میں کپتان ٹیمبا باووما، اوٹنیل بارٹمین، کوربن بوش، میتھیو بریٹزکے، جیرالڈ کوئٹزی، کوئنٹن ڈی کوک، ٹونی ڈی زورزی، بیورن فورٹوئن، مارکو یانسن، کیشو مہاراج، کوینا مافاکا، ایڈن مارکرم، ڈیوڈ ملر، نکوابانی موکوئینا، ریان رکلٹن اور ٹرسٹن اسٹبس شامل ہیں۔