فاطمہ ثنا کی شاندار اننگز، ایشیا کپ سیمی فائنل میں پاکستان کا فائٹنگ ٹوٹل

دبئی، 11 ستمبر 2026 (کامران راجہ): فاطمہ ثنا کی شاندار ناقابلِ شکست اننگز کی بدولت پاکستان نے اے سی سی ویمنز ایشیا کپ کے دوسرے سیمی فائنل میں سری لنکا کے خلاف 20 اوورز میں 5 وکٹوں کے نقصان پر 130 رنز کا فائٹنگ ٹوٹل بنا لیا۔ دبئی انٹرنیشنل کرکٹ اسٹیڈیم میں کھیلے گئے میچ میں پاکستان کا آغاز مشکلات سے ہوا اور منیبہ علی صرف 2 رنز بنا کر آؤٹ ہوگئیں، جس کے بعد گل فیروزہ نے شوال ذوالفقار کے ساتھ دوسری وکٹ کے لیے 24 رنز کی شراکت قائم کی۔ گل فیروزہ نے 32 گیندوں پر 21 رنز بنائے جبکہ شوال ذوالفقار نے 16 گیندوں پر 24 رنز کی اننگز میں دو چھکے اور دو چوکے لگائے۔ اس شراکت کے بعد پاکستان نے تیزی سے وکٹیں گنوائیں اور 10 اوورز کے اختتام پر 52 رنز پر 4 وکٹوں سے محروم ہوگیا، تاہم کپتان فاطمہ ثنا نے دو اہم شراکتیں قائم کرکے اننگز کو سنبھالا اور آخری مرحلے میں تیز رفتاری سے رنز بناتے ہوئے پاکستان کو مسابقتی مجموعے تک پہنچایا۔ فاطمہ ثنا 36 گیندوں پر 47 رنز بنا کر ناقابلِ شکست رہیں، ان کی اننگز میں دو چھکے اور چار چوکے شامل تھے۔ سری لنکا کی جانب سے چمُودی پرابودا اور کپتان چماری اتھاپاتھو نے دو، دو وکٹیں حاصل کیں۔ سری لنکا کی پلیئنگ الیون میں امیشا دلانی، چماری اتھاپاتھو (کپتان)، سنجنا کاوندی، ہرشیتھا سماراوکرما، ہاسینی پریرا، کویشا دلہاری، نیلکشیکا سلوا، کاوشنی نوتھیانگانا (وکٹ کیپر)، سوگندیکا کماری، چمُودی پرابودا اور متھالی ایودھیا شامل تھیں، جبکہ پاکستان کی ٹیم میں منیبہ علی (وکٹ کیپر)، شوال ذوالفقار، گل فیروزہ، عائشہ ظفر، صدف شمس، فاطمہ ثنا (کپتان)، ایمان فاطمہ، امِ ہانی، توبا حسن، نشرہ سندھو اور سعدیہ اقبال شامل تھیں۔