اسلام آباد، 7 ستمبر، 2026 (کامران راجہ) – وزیراعظم شہباز شریف کی ہدایت پر پاکستان انسٹی ٹیوٹ آف میڈیکل سائنسز (پمز) اسلام آباد کے انتظامی اور آپریشنل امور کا جائزہ لینے اور جامع اصلاحات کی سفارشات مرتب کرنے کے لیے 20 رکنی خصوصی کمیٹی تشکیل دے دی گئی ہے۔ وزارتِ صحت کے ذرائع کے مطابق کمیٹی میں سرکاری اور نجی شعبے سے تعلق رکھنے والے ممتاز ماہرینِ صحت شامل ہیں۔ کمیٹی پمز کے انتظامی ڈھانچے، انتظامی امور اور ہسپتال کے مجموعی نظام کا جائزہ لے گی اور ہسپتال کی کارکردگی اور مریضوں کی دیکھ بھال میں بہتری کے لیے سفارشات پیش کرے گی۔ کمیٹی اپنی رپورٹ وزیراعظم شہباز شریف کو پیش کرے گی، جس کی سفارشات کی روشنی میں وزیراعظم پمز کے حوالے سے حتمی فیصلہ کریں گے۔ حکومت نے پمز کے امور کی نگرانی کے لیے بورڈ آف گورنرز قائم کرنے کا بھی فیصلہ کیا ہے۔ بورڈ میں مختلف شعبہ ہائے زندگی سے تعلق رکھنے والے افراد اور ماہرین کو شامل کیا جائے گا۔ اصلاحاتی کمیٹی کا قیام 26 اگست کو پمز میں پیش آنے والے المناک آتشزدگی کے واقعے کے بعد عمل میں لایا گیا ہے، جس میں 14 نومولود بچے جاں بحق ہوگئے تھے۔ واقعے کے بعد ایگزیکٹو ڈائریکٹر سمیت آٹھ افسران کو معطل کر دیا گیا، جبکہ معطل افسران کے خلاف فوجداری کارروائی بھی شروع کی گئی ہے۔ حکومت کی جانب سے کمیٹی کی سفارشات کی روشنی میں ہسپتال کے انتظامی نظام کو مضبوط بنانے، حفاظتی اقدامات بہتر کرنے اور مریضوں کو بہتر طبی سہولیات کی فراہمی کے لیے مزید اقدامات متوقع ہیں۔