سوکوٹو، نائجیریا، 21 اگست 2026 (نیوز ڈیسک) — نائجیریا کی شمال مغربی ریاست سوکوٹو میں جمعرات کو ایک گنجائش سے زیادہ افراد سے بھری کشتی الٹنے کے نتیجے میں کم از کم 50 افراد جاں بحق ہوگئے، جن میں زیادہ تر بچے شامل ہیں۔ عینی شاہدین اور حکام کے مطابق حادثہ گورونیو لوکل گورنمنٹ ایریا کے قریب گوراؤ کے مقام پر پیش آیا، جہاں امدادی کارروائیاں جاری ہیں۔ نیشنل ان لینڈ واٹر ویز اتھارٹی کے ایریا منیجر عبدالقادر یوسف نے حادثے کی تصدیق کی۔ رائٹرز کے ایک عینی شاہد نے بتایا کہ ایک مقامی مسجد کے صحن میں 50 لاشیں رکھی گئی تھیں، جن میں سے کئی کو چٹائیوں اور روایتی کپڑوں میں لپیٹا گیا تھا۔ لاشوں کی تدفین جمعرات کو گوراؤ میں کی گئی۔مقامی رہائشیوں کے مطابق کشتی میں کھیتوں کے مالکان اور چاول کی فصل کی کٹائی کے لیے رکھے گئے مزدور سوار تھے۔ ایک رہائشی نے بتایا کہ کشتی میں 70 سے زائد افراد موجود تھے، جبکہ ایک اور مقامی شخص کے مطابق مسافروں کی تعداد 57 تھی عبدالقادر یوسف نے بتایا کہ اب تک تقریباً 40 بچوں کی لاشیں نکالی جا چکی ہیں۔ سوکوٹو اسٹیٹ ہاؤس آف اسمبلی کے رکن نصیر و آدامو نے بتایا کہ کشتی میں سوار بیشتر افراد کی عمریں 10 سے 15 سال کے درمیان تھیں، جبکہ 16 افراد کو زندہ بچا لیا گیا۔ ایک عینی شاہد شربیللو کیلیا نے بتایا کہ 46 افراد کی تدفین کی جا چکی ہے اور مزید لاشیں بھی جائے حادثہ پر لائی جا رہی ہیں، جس کے بعد ہلاکتوں کی تعداد 53 تک پہنچ گئی ہے۔ ریاستی ایمرجنسی مینجمنٹ ایجنسی کے ڈائریکٹر برائے امداد و بحالی مصطفیٰ عمر نے کہا کہ حکام جائے حادثہ کی جانب روانہ ہو رہے ہیں اور مزید معلومات بعد میں فراہم کی جائیں گی۔ نائجیریا میں کشتیوں کے مہلک حادثات نسبتاً عام ہیں، جہاں گنجائش سے زیادہ مسافروں کی سواریاں، کشتیوں کی ناقص دیکھ بھال اور حفاظتی ضوابط پر کمزور عمل درآمد اکثر دریاؤں اور آبی گزرگاہوں میں حادثات کا سبب بنتا ہے، خاص طور پر برسات کے موسم میں۔یہ سانحہ جنوری میں پیش آنے والے ایک اور حادثے کے بعد ہوا ہے، جب شمال مشرقی ریاست یوبے میں ایک لیکیج والی کشتی الٹنے سے کم از کم 25 افراد جاں بحق ہوگئے تھے۔