لاہور، 18 اگست، 2026 (غفران): اوکاڑہ سے تعلق رکھنے والے پنجاب اسمبلی کے ارکان نے منگل کے روز وزیراعلیٰ پنجاب مریم نواز سے ملاقات کی، جس میں صوبے کی سیاسی صورتحال، جاری ترقیاتی منصوبوں اور اپنے حلقوں کے عوامی مسائل پر تبادلہ خیال کیا گیا۔ملاقات میں ارکان اسمبلی عاشق حسین شاہ، جاوید علاؤالدین ساجد، چوہدری افتخار حسین چھچھر، نورالامین وٹو، علی عباس، میاں یاور زمان، میاں محمد منیر اور غلام رضا نے شرکت کی۔ارکان اسمبلی نے وزیراعلیٰ کو اپنے اپنے حلقوں میں عوام کو درپیش مسائل سے آگاہ کیا۔ مریم نواز نے انہیں حکومت کی جانب سے بھرپور تعاون کی یقین دہانی کراتے ہوئے ہدایت کی کہ وہ عوام سے قریبی رابطہ رکھیں اور ان کے مسائل کے حل کے لیے مؤثر کردار ادا کریں۔ارکان اسمبلی نے 41 اضلاع اور 2 تحصیلوں میں مربوط سیف سٹی نیٹ ورک قائم کرنے پر وزیراعلیٰ کو خراج تحسین پیش کیا۔ انہوں نے اوکاڑہ جی ٹی روڈ سے بائی پاس روڈ کی تعمیر و بحالی اور شہریوں کے لیے الیکٹرو بس سروس شروع کرنے پر بھی وزیراعلیٰ کا شکریہ ادا کیا۔

ارکان اسمبلی کے مطابق اوکاڑہ میں الیکٹرو بسیں جنرل بس اسٹینڈ سے اخترآباد، کرمانوالہ، اڈا کسان اور اوکاڑہ یونیورسٹی تک چلائی جا رہی ہیں۔ انہوں نے طلبہ، خواتین اور بزرگ شہریوں کے لیے مفت سفری سہولت کو ایک مثبت اقدام قرار دیا۔ارکان اسمبلی نے سیف سٹی منصوبے اور پولیس اقدامات کو بھی سراہتے ہوئے کہا کہ ان اقدامات کے باعث پنجاب بھر میں جرائم میں بتدریج کمی آ رہی ہے۔ انہوں نے الیکٹرو بس سروس، اپنی چھت اپنا گھر پروگرام اور کسان کارڈ سمیت مختلف حکومتی اقدامات کو عوام میں مقبول قرار دیا۔وزیراعلیٰ مریم نواز نے کہا کہ ان کی حکومت مختصر مدت میں زیادہ سے زیادہ عوامی فلاح کے منصوبے مکمل کرنا چاہتی ہے۔ انہوں نے کہا کہ صفا پنجاب پروگرام کے ذریعے شہروں اور دیہات میں بلاامتیاز صفائی کے نظام کو بہتر بنایا جا رہا ہے۔وزیراعلیٰ نے کہا کہ پنجاب کے عوام کے معیار زندگی میں بہتری کی اطلاعات سن کر انہیں خوشی ہوئی ہے۔ انہوں نے مزید کہا کہ لاہور اور کم ترقی یافتہ شہروں کے درمیان ترقیاتی فرق کم کرنے کے لیے اقدامات کیے جا رہے ہیں جبکہ صوبے کے مزید شہروں اور دیہات تک الیکٹرو بس سروس کا دائرہ وسیع کیا جائے گا۔