بوگوٹا، 11 اگست 2026 (غفران): مغربی کولمبیا میں پیر کی صبح آنے والے 7.4 شدت کے شدید زلزلے کے نتیجے میں کم از کم 111 افراد ہلاک ہوگئے، جبکہ کئی شہروں میں عمارتیں منہدم ہونے سے متعدد افراد ملبے تلے دب گئے۔امریکی جیولوجیکل سروے کے مطابق زلزلے کا مرکز بحرالکاہل کے ساحلی صوبے چوکو میں سان ہوزے ڈیل پالمر کے قریب تقریباً 107 کلومیٹر کی گہرائی میں تھا۔ زلزلے کے جھٹکے ملک کے بڑے شہروں سمیت مختلف علاقوں میں محسوس کیے گئے۔ حکام نے خبردار کیا کہ بڑے پیمانے پر جانی نقصان اور تباہی کا خدشہ ہے جبکہ امدادی ٹیمیں متاثرہ علاقوں میں کارروائیاں جاری رکھے ہوئے ہیں۔سب سے زیادہ ہلاکتیں مغربی صوبے ریسارالدا میں رپورٹ ہوئیں، جہاں گورنر خوان ڈیاگو پاتیانو کے مطابق 42 افراد جان کی بازی ہار گئے۔ پریرا میں شدید متاثرہ عمارت کا اگلا حصہ اچانک منہدم ہوگیا جس سے سڑکوں پر ملبے اور گردوغبار کے بادل چھا گئے۔ مانی زالس میں تین افراد ہلاک ہوئے جبکہ زلزلے سے ایک تاریخی طرز کے گرجا گھر کو بھی نقصان پہنچا۔ دوسری جانب کالی کے اسپتالوں میں مریضوں کو احتیاطی طور پر بستروں سمیت باہر منتقل کردیا گیا۔بوئنا وینتورا میں ایک عمارت منہدم ہونے سے ایک شخص ہلاک جبکہ کئی افراد ملبے تلے پھنس گئے۔ کالی کے میئر الیخاندرو ایڈر نے بتایا کہ شہر میں دو درجن سے زائد عمارتیں منہدم ہوچکی ہیں اور امدادی کارکن ایک معمر خاتون اور ایک کمسن لڑکی سمیت دو افراد کو زندہ نکالنے میں کامیاب ہوگئے ہیں۔ انہوں نے کہا کہ امدادی ٹیمیں کم از کم 12 اہم مقامات پر کارروائی کررہی ہیں اور بوگوٹا اور میڈیلین سے مزید امدادی ٹیمیں طلب کی گئی ہیں۔
چوکو کی گورنر نوبیا کیرولینا کورڈوبا کوری نے صوبائی دارالحکومت کیبدو میں زخمیوں اور بڑے پیمانے پر نقصان کی اطلاع دی اور شہریوں کو ممکنہ آفٹر شاکس کے پیش نظر محتاط رہنے کی ہدایت کی۔یہ زلزلہ کولمبیا کے صدر ایبلاردو ڈی لا ایسپریئیا کے حلف اٹھانے کے چند روز بعد آیا، جس کے باعث نئی حکومت کو اپنے ابتدائی دنوں ہی میں ایک بڑے قومی بحران کا سامنا کرنا پڑا۔ صدر نے اپنی طے شدہ سرگرمیاں معطل کرکے بوگوٹا کا رخ کیا تاکہ ہنگامی صورتحال سے نمٹنے کے لیے امدادی سرگرمیوں کی نگرانی کرسکیں۔کولمبیا کی سول ایوی ایشن اتھارٹی نے پریرا، مانی زالس، کیبدو، آرمینیا، کارتاگو اور بوئنا وینتورا کے ہوائی اڈوں پر پروازیں عارضی طور پر معطل کردیں تاکہ ماہرین ممکنہ ساختی نقصانات کا جائزہ لے سکیں۔ امریکی سونامی وارننگ سسٹم نے زلزلے کے بعد سونامی کا کوئی خطرہ ظاہر نہیں کیا۔
زلزلے کے جھٹکے کولمبیا کے نو محکموں اور تمام 32 صوبائی دارالحکومتوں میں محسوس کیے گئے۔ وینزویلا کے سرحدی علاقے تاچیرا اور وسطی مغربی شہر بارکیسیمیٹو میں بھی زلزلے کے جھٹکے محسوس کیے جانے کی اطلاعات موصول ہوئیں۔کولمبیا زلزلہ خیز خطے میں واقع ہے اور ماضی میں بھی بڑے زلزلوں اور لینڈ سلائیڈنگ کا سامنا کرچکا ہے۔ 1999 میں ملک کے کافی پیدا کرنے والے علاقے میں آنے والے زلزلے کے نتیجے میں ایک ہزار سے زائد افراد ہلاک ہوئے تھے، جبکہ 1985 میں آرمرو کے تباہ کن سانحے میں آتش فشانی سرگرمی کے نتیجے میں آنے والے مٹی کے تودوں نے تقریباً 25 ہزار افراد کی جان لے لی تھی۔امدادی اور ریسکیو کارروائیاں تاحال جاری ہیں جبکہ حکام تباہی کی مکمل شدت کا جائزہ لینے اور منہدم عمارتوں کے ملبے تلے پھنسے ممکنہ افراد کی تلاش میں مصروف ہیں۔