تھمپو، بھوٹان | یکم اگست 2026(نوشین): جنوبی ایشیائی فٹبال فیڈریشن (سیف) کانگریس کے موقع پر ہفتہ کے روز تھمپو، بھوٹان میں ہونے والی قرعہ اندازی کے نتیجے میں پاکستان کو 2026 سیف چیمپئن شپ کے گروپ “بی” میں روایتی حریف بھارت اور مالدیپ کے ساتھ شامل کیا گیا ہے۔
جنوبی ایشیا کے سب سے بڑے فٹبال ٹورنامنٹ کی میزبانی بنگلہ دیش کرے گا، جو 4 نومبر سے 17 نومبر 2026 تک منعقد ہوگا۔
قرعہ اندازی کے مطابق میزبان بنگلہ دیش کو گروپ “اے” میں سری لنکا اور بھوٹان کے ساتھ رکھا گیا ہے، جبکہ گروپ “بی” میں پاکستان، بھارت اور مالدیپ سیمی فائنل مرحلے تک رسائی کے لیے مدمقابل ہوں گے۔
پاکستانی ٹیم اس اہم ایونٹ میں حالیہ شاندار کارکردگی کے ساتھ میدان میں اترے گی۔ قومی ٹیم نے جون 2026 میں مالدیپ میں منعقدہ ڈائمنڈ جوبلی بین الاقوامی ٹورنامنٹ کا تاریخی ٹائٹل اپنے نام کیا تھا۔ اس ٹورنامنٹ میں پاکستان نے مالدیپ کو 0-3 سے شکست دی تھی، جس میں عمر نواز، عبدالصمد اور ہارون حمید نے گول اسکور کیے تھے۔
سیف چیمپئن شپ سے قبل قومی ٹیم ستمبر اور اکتوبر میں منعقد ہونے والے افتتاحی فیفا آسیان کپ میں بھی شرکت کرے گی، جہاں قومی ٹیم کے ہیڈ کوچ نولبرٹو سولانو کی قیادت میں کھلاڑی مزید بین الاقوامی تجربہ حاصل کریں گے۔
پاکستان اور بھارت کے درمیان مقابلہ خصوصی توجہ کا مرکز ہوگا، کیونکہ دونوں ٹیمیں 2023 سیف چیمپئن شپ کے بعد پہلی مرتبہ آمنے سامنے آئیں گی۔ اس سے قبل بھارت نے پاکستان کو چار صفر سے شکست دی تھی۔
سیف کانگریس کے دوران قاضی صلاح الدین کو بلا مقابلہ ایک مرتبہ پھر جنوبی ایشیائی فٹبال فیڈریشن کا صدر منتخب کر لیا گیا، جس سے ان کی قیادت پر رکن ممالک کے اعتماد کا اظہار ہوا۔
پاکستان فٹبال فیڈریشن نے امید ظاہر کی ہے کہ قومی ٹیم حالیہ کامیابیوں کے تسلسل کو برقرار رکھتے ہوئے سیف چیمپئن شپ میں بھی بہترین کھیل پیش کرے گی اور خطے کے اس بڑے ٹورنامنٹ میں نمایاں کامیابی حاصل کرے گی۔