اسلام آباد، 7 نومبر 2026 (کامران راجہ): 11ویں تھل ڈیزرٹ جیپ ریلی 2026 کے سلسلے میں تونسہ بیراج کے ٹی ڈی سی پی ریزورٹ میں ڈرائیورز اور نیویگیٹرز کانفرنس کے بعد موسیقی کی رنگا رنگ محفل کا انعقاد کیا گیا، جس میں ملک بھر سے نامور جیپ ریلی ڈرائیورز، معزز شخصیات اور شائقین نے شرکت کی۔ کمشنر ڈیرہ غازی خان اشفاق احمد چوہدری اور ریجنل پولیس آفیسر محمد اظہر اکرام تقریب کے مہمان خصوصی تھے، جبکہ ڈپٹی کمشنر کوٹ ادو محمد جواد حیدر شیرازی نے مہمانوں کا استقبال کیا اور تقریب کی میزبانی کے فرائض انجام دیے۔ تقریب میں ڈپٹی کمشنر ڈیرہ غازی خان بیرسٹر بلال سلیم اور ڈسٹرکٹ پولیس آفیسر کوٹ ادو منصور قمر مفتی بھی موجود تھے۔ ٹی ڈی سی پی کے جنرل منیجر فرحت حسین فاروق کے علاوہ ملک کے نامور آف روڈ ریسرز اور دیگر ممتاز شخصیات نے بھی تقریب میں شرکت کی۔ اس تقریب نے 11ویں تھل ڈیزرٹ جیپ ریلی کی رونقوں میں مزید اضافہ کیا اور خطے کی سیاحتی صلاحیت کو اجاگر کرنے کے ساتھ ڈرائیورز، حکام اور شائقین کو ایک جگہ جمع ہونے کا موقع فراہم کیا۔ دریں اثنا، ڈپٹی کمشنر کوٹ ادو نے جیپ ریلی کے سلسلے میں ہفتہ 7 نومبر کو ضلع میں مقامی تعطیل کا اعلان بھی کیا ہے۔