مظفرآباد، 7 اکتوبر 2026 (کامران راجہ): آزاد جموں و کشمیر پولیس کے مطابق کوٹلی میں احتجاج کی آڑ میں امن و امان خراب کرنے اور معمولات زندگی مفلوج کرنے کی مبینہ منصوبہ بندی کے الزام میں 8 مشتبہ افراد کو گرفتار کرلیا گیا ہے۔ پولیس حکام نے پریس کانفرنس کرتے ہوئے بتایا کہ مبینہ منصوبے کے تحت مختلف اضلاع میں اجلاس منعقد کیے گئے، جبکہ کوٹلی میں ہونے والے ایک اجلاس میں مشتبہ عناصر کو اسلحہ، آمدورفت اور مقامی سہولت کار فراہم کرنے کے انتظامات کیے گئے۔ پولیس کے مطابق گرفتار 8 مشتبہ افراد کے قبضے سے پستول اور دیگر اسلحہ برآمد کیا گیا۔ پولیس حکام نے بتایا کہ مشتبہ افراد نے کالا ڈب کے مقام پر کارروائی کی، جس کے دوران ایک پولیس کانسٹیبل شدید زخمی ہوا اور راولپنڈی کے اسپتال میں زندگی اور موت کی کشمکش میں ہے۔ واقعے کے دوران پوسٹ کمانڈر نعیم بھی زخمی ہوئے۔ پولیس نے بتایا کہ اہلکاروں نے کارروائی کرتے ہوئے سڑک کلیئر کرائی اور صورتحال پر قابو پالیا۔ پولیس حکام کے مطابق گرفتار افراد سے تفتیش کے دوران مزید معلومات سامنے آئی ہیں، جن کی بنیاد پر مزید کارروائی کی جائے گی۔ پولیس نے دعویٰ کیا کہ کوٹلی شہر مبینہ طور پر مشتبہ افراد کے آئندہ منصوبے کا ہدف تھا، تاہم تحقیقات مکمل ہونے تک بعض حساس تفصیلات ظاہر نہیں کی جاسکتیں۔ پولیس کے مطابق گرفتار افراد احتجاج کی آڑ میں معمولات زندگی متاثر کرنے کی مبینہ کوشش کر رہے تھے، جبکہ حکام نے واضح کیا کہ امن و امان خراب کرنے کی کسی بھی کوشش سے قانون کے مطابق نمٹا جائے گا۔