اسلام آباد، 24 ستمبر 2026 (کامران راجہ): وفاقی حکومت نے پاکستان تحریک انصاف (پی ٹی آئی) کے 27 ستمبر کو وفاقی دارالحکومت کی جانب اعلان کردہ لانگ مارچ کے پیش نظر اسلام آباد اور پنجاب کے متعدد اضلاع میں 20 ستمبر سے 5 اکتوبر تک پاکستان رینجرز کی تعیناتی کی منظوری دے دی ہے۔ وزارت داخلہ و انسداد منشیات کی جانب سے جاری نوٹیفکیشن کے مطابق رینجرز اہلکار پاکستان رینجرز آرڈیننس 1959 اور انسداد دہشت گردی ایکٹ 1997 کی متعلقہ دفعات کے تحت تعینات رہیں گے۔ نوٹیفکیشن میں رینجرز اور پولیس کو پرتشدد سرگرمیوں اور سکیورٹی خطرات سے نمٹنے کے لیے ضروری اقدامات کرنے کی اجازت دی گئی ہے، جبکہ مسلح یا شرپسند گروہوں کے حملوں کی صورت میں اپنے دفاع میں کارروائی کرنے کی بھی ہدایت کی گئی ہے۔ پنجاب حکومت نے اس سے قبل راولپنڈی، اٹک، جہلم اور میانوالی میں 22 ستمبر سے 5 اکتوبر تک امن و امان برقرار رکھنے کے لیے پولیس کی معاونت کی غرض سے رینجرز کی تعیناتی کی درخواست کی تھی۔ اسلام آباد اور پنجاب کے مختلف علاقوں میں دفعہ 144 بھی نافذ کردی گئی ہے۔ ادھر لانگ مارچ سے قبل حکومت اور پی ٹی آئی کے رہنماؤں کے درمیان پس پردہ رابطوں کے حوالے سے متضاد بیانات سامنے آئے ہیں۔ وزیراعظم کے مشیر برائے سیاسی امور رانا ثناء اللہ نے کہا ہے کہ پی ٹی آئی کی جانب سے لانگ مارچ ملتوی کیے بغیر مذاکرات نہیں ہوسکتے۔ انہوں نے دعویٰ کیا کہ سڑکیں کھلی ہیں اور کنٹینرز احتیاطی تدبیر کے طور پر رکھے گئے ہیں۔