اسلام آباد، 26 اگست 2026 (کامران راجہ) — وزیراعظم محمد شہباز شریف نے پاکستان انسٹی ٹیوٹ آف میڈیکل سائنسز (پمز) کی نرسری میں ہونے والی المناک آتشزدگی کے واقعے کے بعد وفاقی سیکریٹری صحت اسلم غوری کو معطل کرکے عہدے سے ہٹا دیا ہے۔ آتشزدگی کے نتیجے میں 14 نومولود بچے جاں بحق ہوئے۔ یہ فیصلہ وزیراعظم کی زیر صدارت پمز آتشزدگی کے واقعے کا جائزہ لینے کے لیے منعقدہ اعلیٰ سطحی اجلاس میں کیا گیا۔ وزیراعظم نے متعلقہ حکام کی کارکردگی پر سخت برہمی کا اظہار کرتے ہوئے فوری کارروائی کے احکامات جاری کیے۔ وزیراعظم شہباز شریف نے سانحے کی جامع تحقیقات اور جاں بحق بچوں کی اموات کی ذمہ داری کا تعین کرنے کے لیے اعلیٰ سطحی تحقیقاتی کمیٹی بھی تشکیل دے دی ہے۔ سابق سیکریٹری داخلہ شاہد خان کو تحقیقاتی کمیٹی کا سربراہ مقرر کیا گیا ہے، جبکہ سیکریٹری اسٹیبلشمنٹ ڈاکٹر بیرسٹر نوئل اعوان بھی کمیٹی کے ارکان میں شامل ہیں۔ اس سے قبل وزیراعظم شہباز شریف نے آتشزدگی کے واقعے میں 14 نومولود بچوں کے جاں بحق ہونے پر گہرے دکھ اور افسوس کا اظہار کرتے ہوئے حکام کو فوری تحقیقات کی ہدایت کی تھی۔ وزیراعظم نے معصوم بچوں کی اموات کو ناقابل تلافی سانحہ قرار دیتے ہوئے کہا کہ واقعے کے تمام حالات و واقعات کا مکمل جائزہ لیا جائے اور ذمہ دار افراد کا تعین کیا جائے۔ وزیراعظم نے جاں بحق بچوں کے لواحقین سے دلی تعزیت کا اظہار کرتے ہوئے کہا کہ وہ اس المناک نقصان پر سوگوار خاندانوں کے غم میں برابر کے شریک ہیں۔ انہوں نے جاں بحق بچوں کے والدین اور اہل خانہ کے لیے صبر و استقامت کی دعا بھی کی۔